எரிபொருள் முதல் சுகாதாரம் வரை: அத்தியாவசிய சேவைகள் பட்டியல் அறிவிப்பு – ஜனாதிபதி அதிரடி
ஜனாதிபதி அநுரகுமார திஸாநாயக்க தலைமையில் இலங்கையில் பொதுமக்களின் அன்றாட வாழ்க்கையைப் பாதுகாக்கும் நோக்கில் முக்கிய சேவைகள் அத்தியாவசியமாக அறிவிக்கப்பட்டுள்ளன.
இதற்கான அதிவிசேட வர்த்தமானி அறிவித்தல் ஜனாதிபதியின் செயலாளர் நந்திக சனத் குமாநாயக்கவின் கையொப்பத்துடன் வெளியிடப்பட்டுள்ளது. இந்த நடவடிக்கை, நாட்டின் முக்கிய சேவைகள் இடையூறு இல்லாமல் தொடர்வதை உறுதி செய்யும் வகையில் எடுக்கப்பட்டதாக அதிகாரிகள் தெரிவித்துள்ளனர்.
அறிவிப்பின் படி, மின்சாரம் உற்பத்தி, சேமிப்பு மற்றும் விநியோகம் உள்ளிட்ட அனைத்து மின்சாரச் சேவைகளும் அத்தியாவசியமாக வகைப்படுத்தப்பட்டுள்ளன. அதேபோல், பெற்றோலியப் பொருட்கள் மற்றும் திரவ எரிவாயு உள்ளிட்ட எரிபொருள் விநியோகம் மற்றும் போக்குவரத்தும் முக்கிய சேவையாக அறிவிக்கப்பட்டுள்ளது.
இவை நாட்டின் பொருளாதாரத்திற்கும் பொதுமக்களின் அன்றாட தேவைகளுக்கும் நேரடி தொடர்புடையவை என்பதால் இந்த முடிவு எடுக்கப்பட்டுள்ளது.
மேலும், அரசாங்க வைத்தியசாலைகள், மருந்தகங்கள் மற்றும் பிற மருத்துவ நிறுவனங்கள் வழங்கும் சுகாதாரச் சேவைகளும் அத்தியாவசிய சேவைகளின் பட்டியலில் சேர்க்கப்பட்டுள்ளன.
பொதுப் பாதுகாப்பு கட்டளைச் சட்டத்தின் கீழ் ஜனாதிபதிக்கு வழங்கப்பட்ட அதிகாரங்களின் அடிப்படையில் இந்த அறிவிப்பு வெளியிடப்பட்டுள்ளது என்பது குறிப்பிடத்தக்கது.
இந்த அறிவிப்பின் மூலம், குறித்த துறைகளில் பணிபுரியும் ஊழியர்கள் பணிப்பகிஷ்கரிப்பு போன்ற நடவடிக்கைகளில் ஈடுபட முடியாத நிலை உருவாகியுள்ளது. சேவைகள் தடையின்றி நடைபெறுவதன் மூலம் பொதுமக்களின் இயல்பு வாழ்க்கை பாதிக்கப்படாமல் பாதுகாக்கப்படுவதே இந்த தீர்மானத்தின் முக்கிய நோக்கமாக பார்க்கப்படுகிறது.
