MH370 விமானத்தை தேடும் பணி டிசம்பர் 30 முதல் மீண்டும் தொடங்குகிறது!

2014 மார்ச் 8 அன்று மலேசியாவின் கோலாலம்பூரிலிருந்து சீனாவின் பெய்ஜிங்குக்குச் செல்லும் வழியில் 239 பேருடன் காணாமல் போன மலேசிய ஏர்லைன்ஸ் விமானம் MH370 தொடர்பான தேடுதல் பணி, டிசம்பர் 30, 2025 முதல் மீண்டும் ஆரம்பிக்கப்பட உள்ளது என மலேசிய போக்குவரத்து அமைச்சகம் அதிகாரப்பூர்வமாக உறுதிப்படுத்தியுள்ளது.

போயிங் 777 விமானமான MH370, 227 பயணிகள் மற்றும் 12 பணியாளர்களுடன் காணாமல் போனது. இது வரலாற்றிலேயே மிகப் பெரிய விமான மர்மங்களில் ஒன்றாக கருதப்படுகிறது. ஏறத்தாழ 11 ஆண்டுகளுக்கும் மேலாக இந்த விமானத்தின் சரியான இடம் குறித்து எந்த தெளிவும் இல்லை.

சமீபத்தில், ஒரு நபர் இந்த விமானம் விபத்துக்குள்ளானதை நேரில் கண்டதாக கூறியது மற்றும் முதன்மை நம்பகமான தகவல்கள் கிடைத்தது போன்ற தகவல்கள், தேடுதலை மீண்டும் மேற்கொள்ள மலேசிய அரசைத் தூண்டியுள்ளன.

இந்த முயற்சியை ஓஷன் இன்ஃபினிட்டி (Ocean Infinity) என்ற தனியார் ஆழ்கடல் ஆய்வு நிறுவனம் முன்னின்று நடத்தவுள்ளது. தெற்கு இந்தியப் பெருங்கடலில், முன்னதாக அடையாளம் காணப்பட்ட சந்தேகத்திற்குரிய பகுதியில், 15,000 சதுர கிலோமீட்டர் பரப்பளவில் தீவிர தேடுதல் நடைபெறும்.

இந்த தேடுதல் நடவடிக்கை 55 நாட்கள் நீடிக்கும் என எதிர்பார்க்கப்படுகிறது. விமானத்தின் இடிபாடுகள் அல்லது கணிசமான ஆதாரங்கள் கண்டுபிடிக்கப்பட்டால், ஓஷன் இன்ஃபினிட்டி மலேசிய அரசிடமிருந்து 70 மில்லியன் அமெரிக்க டாலர்கள் பரிசுத் தொகையாகப் பெறும் என அறிவிக்கப்பட்டுள்ளது.

இந்த முயற்சி, விமானத்தின் காணாமல் போன புதிரைத் தீர்க்கவும், பாதிக்கப்பட்ட குடும்பங்களுக்கு மன அமைதி அளிக்கவும் முக்கிய பங்காற்றும் என எதிர்பார்க்கப்படுகிறது.