2035 மகளிர் உலகக் கோப்பையை நடத்த பிரித்தானியா அதிகாரப்பூர்வ விண்ணப்பம் சமர்ப்பிப்பு

2035ஆம் ஆண்டு நடைபெறவுள்ள மகளிர் FIFA உலகக் கோப்பையை நடத்துவதற்கான அதிகாரப்பூர்வ முயற்சியை பிரித்தானியா ஆரம்பித்துள்ளது. இங்கிலாந்து, ஸ்காட்லாந்து, வேல்ஸ் மற்றும் வட ஐர்லாந்து ஆகிய நான்கு நாடுகள் இணைந்து இந்த மாபெரும் போட்டியை நடத்தும் வகையில் தங்களது ஒருங்கிணைந்த விண்ணப்பத்தை FIFA-க்கு சமர்ப்பித்துள்ளன. 1966ஆம் ஆண்டு ஆண்கள் உலகக் கோப்பை நடந்து கடந்த பிறகு, பிரித்தானியாவில் நடைபெறவுள்ள மிகப் பெரிய FIFA போட்டி இதுவாக இருக்கும்.

இந்த விண்ணப்பத்தில் மொத்தம் 22 மைதானங்கள் சேர்க்கப்பட்டுள்ளன. அவற்றில் பெரும்பாலானவை இங்கிலாந்தில் உள்ளன; வேல்ஸ், ஸ்காட்லாந்து மற்றும் வட ஐர்லாந்திலும் தலா மைதானங்கள் ஒதுக்கப்பட்டுள்ளன. “All Together” என்ற கருப்பொருளை மையமாகக் கொண்டு, மகளிர் கால்பந்தை உலகளவில் மேலும் வலுப்படுத்தும் நோக்கத்துடன் இம்முயற்சி வடிவமைக்கப்பட்டுள்ளது.

FA, Irish FA, Scottish FA மற்றும் FA of Wales ஆகியவை வெளியிட்ட கூட்டு அறிக்கையில், இந்த உலகக் கோப்பையை நடத்துவது நான்கு நாடுகளுக்கும் பெருமை என கூறப்பட்டுள்ளது. மேலும், 4.5 மில்லியன் டிக்கெட்டுகள் வழங்கப்படவுள்ளதுடன், மகளிர் மற்றும் சிறுமிகளின் விளையாட்டு வாய்ப்புகளை அதிகரிக்கும் முக்கிய முயற்சியாக இதை அவர்கள் மதிப்பிடுகின்றனர்.

பங்கேற்பு, முன்னணி மற்றும் வணிக வளர்ச்சி என்ற மூன்று முக்கிய தூண்களை அடிப்படையாகக் கொண்ட இந்த திட்டத்தில், 2035க்குள் மகளிர் அதிகாரிகள் எண்ணிக்கையை இரட்டிப்பாக்குவது, உலகளாவிய வழிகாட்டல் முயற்சிகள் மற்றும் புதிய ரசிகர்களை ஈர்ப்பது போன்ற இலக்குகள் நிர்ணயிக்கப்பட்டுள்ளன.

பிரித்தானிய பிரதமர் கெய்ர் ஸ்டார்மர், லயனஸ்ஸஸ் அணியின் வெற்றி நாடு முழுவதும் சிறுமிகளை ஊக்குவித்ததாகவும், உலகக் கோப்பையை நடத்துவது சமூகங்களுக்கும் வணிகங்களுக்கும் மிகப் பெரிய பலன்களை வழங்கும் என்றும் தெரிவித்துள்ளார். தற்போது இந்த விண்ணப்பத்திற்கு எதிராளிகள் எவரும் இல்லை. இறுதி முடிவு அடுத்த ஆண்டு FIFA காங்கிரஸில் வாக்கெடுப்பின்போது எடுக்கப்படும். மேலும், 2031 முதல் மகளிர் உலகக் கோப்பை 48 அணிகளுடன் நடைபெறவுள்ளது என்பது குறிப்பிடத்தக்கது.