டித்வா புயல் பாதிப்பு: இலங்கைக்கு உதவிகளை அறிவித்த அவுஸ்திரேலியா, சீனா, ஜப்பான், இந்தியா

டித்வா புயலால் கடுமையாக தாக்கமடைந்த இலங்கைக்கு சர்வதேச சமூகம் பல்வேறு வடிவங்களில் அவசர உதவிகளை வழங்கி வருகிறது. பாதிக்கப்பட்ட மக்களின் உடனடி தேவைகளை பூர்த்தி செய்வதற்காக பல நாடுகள் தங்களது நிவாரண நடவடிக்கைகளை அறிவித்துள்ளன.

அவுஸ்திரேலியா

இலங்கையின் அவசர நிலையை முன்னிட்டு, அவுஸ்திரேலிய அரசு ஒரு மில்லியன் அவுஸ்திரேலிய டொலர் (AUD 1 million) மதிப்பிலான அவசர நிதியுதவியை அறிவித்துள்ளது.

இந்த நிதி, புயலால் பாதிக்கப்பட்ட மக்களுக்கு நேரடியாக நிவாரணப் பொருட்களை வழங்க பயன்படுத்தப்படும் என கொழும்பு அவுஸ்திரேலிய உயர்ஸ்தானிகரகம் தெரிவித்துள்ளது.

சீனா

சீனாவும் அவசர நிவாரணமாக USD 100,000 அளிக்கும் என அறிவித்துள்ளது.

சீன செஞ்சிலுவைச் சங்கம் இந்த நிதியை இலங்கை செஞ்சிலுவைச் சங்கத்துக்கு உத்தியோகபூர்வமாக வழங்கியது என்று இலங்கைக்கான சீன தூதரகம் தனது எக்ஸ் (X) கணக்கில் உறுதிப்படுத்தியுள்ளது.

ஜப்பான்

டித்வா சூறாவளி ஏற்படுத்திய பரவலான சேதத்தை முன்னிட்டு, ஜப்பான் அரசு சர்வதேச அவசர உதவிக் குழு மற்றும் மருத்துவக் குழுவை இலங்கைக்கு அனுப்ப முடிவு செய்துள்ளது.

பாதிக்கப்பட்ட பகுதிகளில் மருத்துவம், தங்குமிடம் மற்றும் அத்தியாவசிய உதவிகளை வழங்க இந்தக் குழுக்கள் செயல்படும்.

இந்தியா

இதேநேரத்தில், இந்தியாவும் இரண்டாம் கட்ட அவசர உதவித் தொகுப்பு மற்றும் நிவாரணப் பொருட்களை இலங்கைக்கு அனுப்பியுள்ளது.
முதல் கட்ட நிவாரணத்துக்கு பின், கூடுதல் தேவைகளை பூர்த்தி செய்ய இந்தியா மேற்கொண்ட நடவடிக்கை பாராட்டப்படுகிறது.

டித்வா புயலால் ஏற்பட்ட நெருக்கடியை தணிக்க உலக நாடுகள் வழங்கும் இந்த மனிதாபிமான உதவிகள், இலங்கையின் மீட்பு முயற்சிகளில் முக்கிய பங்காற்றுகின்றன.