கண்டியில் மீண்டும் நிலச்சரிவு – ஒருவர் காயம், 3 வீடுகள் சேதம்; 90 குடும்பங்கள் பாதுகாப்பாக வெளியேற்றம்

டித்வா புயல் ஏற்படுத்திய அனர்த்தங்கள் மெதுவாக சீரமைக்கப்பட்டு வரும் நிலையில், இலங்கையின் கண்டி மாவட்டத்தில் மீண்டும் ஒரு நிலச்சரிவு பதிவாகியுள்ளது. ஹுன்னஸ்கிரி நகருக்கு அருகில் இன்று (டிசம்பர் 18) காலை பெய்த கனமழையைத் தொடர்ந்து ஏற்பட்ட இந்த நிலச்சரிவில் ஒரு நபர் காயமடைந்துள்ளார்.

மாவட்ட அனர்த்த முகாமைத்துவ மத்திய நிலையம் வெளியிட்ட தகவலின்படி, நிலச்சரிவில் 3 வீடுகள் முற்றிலும் சேதமடைந்துள்ளன. மேலும், அருகிலுள்ள இரண்டு தங்குமிடங்களில் இருந்து 90 குடும்பங்கள் பாதுகாப்பான இடங்களுக்கு உடனடியாக வெளியேற்றப்பட்டுள்ளனர். நிலச்சரிவு ஏற்பட்ட பகுதியில் தொடர்ந்து ஆபத்து நிலவுவதால், மேலதிக முன்னெச்சரிக்கை நடவடிக்கைகள் மேற்கொள்ளப்பட்டு வருகின்றன.

இந்நிலையில், கண்டி மற்றும் நுவரெலியா மாவட்டங்களுக்கு மண்சரிவு சிவப்பு அபாய எச்சரிக்கை விடுக்கப்பட்டுள்ளது. இது மிக உயர்ந்த அளவிலான ஆபத்தைக் குறிக்கிறது. அத்துடன், குருநாகல், பதுளை மற்றும் மாத்தளை மாவட்டங்களுக்கு இரண்டாம் நிலை அபாய எச்சரிக்கை (ஆரஞ்சு எச்சரிக்கை) வழங்கப்பட்டுள்ளது.

தொடர் மழை மற்றும் மண் நிலை தளர்வு காரணமாக, மலைப்பாங்கான பகுதிகளில் மேலும் நிலச்சரிவுகள் ஏற்படுவதற்கான சாத்தியக்கூறுகள் இருப்பதால், மக்கள் அதிகாரிகளின் அறிவுறுத்தல்களைக் கண்டிப்பாகப் பின்பற்ற வேண்டும் என்று அனர்த்த முகாமைத்துவ அதிகாரிகள் வலியுறுத்தியுள்ளனர்.