மன்னாரில் அதிர்ச்சி சம்பவம்: கொலையில் முடிந்த குடும்பத் தகராறு – பெண் கைது

மன்னார் பகுதியில் இடம்பெற்ற குடும்பத் தகராறு, கொலை சம்பவமாக மாறியிருப்பது பெரும் அதிர்ச்சியை ஏற்படுத்தியுள்ளது. மூர் வீதி பகுதியில் வாடகை வீட்டில் வசித்து வந்த தம்பதியருக்கு இடையில் ஏற்பட்ட கடுமையான வாக்குவாதம், கணவன் உயிரிழப்புக்கு காரணமாகியுள்ளது.

கடந்த சனிக்கிழமை இரவு ஏற்பட்ட தகராறின் போது, மனைவி தனது கணவரை தாக்கியதாக ஆரம்ப விசாரணைகள் தெரிவிக்கின்றன. அதன் பின்னர் சம்பவத்தை மறைக்க முயன்றதாகவும் கூறப்படுகிறது. சில நேரம் கழித்து, சம்பவம் தொடர்பாக அந்த பெண் தானாகவே பொலிஸாரிடம் சரணடைந்துள்ளார்.

தகவல் கிடைத்தவுடன் சம்பவ இடத்திற்கு சென்ற பொலிஸார், நீதவான் மற்றும் சட்ட வைத்திய அதிகாரியிடம் தகவல் வழங்கினர். அவர்களின் முன்னிலையில் உடல் மீட்கப்பட்டு மேலதிக விசாரணைக்காக எடுத்துச் செல்லப்பட்டது.

உயிரிழந்தவர் 36 வயதுடையவர் என அடையாளம் காணப்பட்டுள்ளார். அவரது உடல் மன்னார் மாவட்ட பொது வைத்தியசாலைக்கு அனுப்பப்பட்டுள்ளது. சம்பவத்தில் தொடர்புடைய பெண் பொலிஸாரால் கைது செய்யப்பட்டுள்ளார்.

மேலும், அந்த பெண் கடந்த இரண்டு மாதங்களாக அப்பகுதியில் உரிய பதிவுகள் இன்றி வசித்து வந்ததாகவும் விசாரணையில் தெரியவந்துள்ளது. சம்பவம் தொடர்பான மேலதிக விசாரணைகளை பொலிஸார் தொடர்ந்து மேற்கொண்டு வருகின்றனர்.