கனேடிய டொலர் மதிப்பு ஏற்றத்தாழ்வு இனி நீடிக்காது: டொனால்டு டிரம்ப் எச்சரிக்கை
கனேடிய டொலரின் மதிப்பு ஏற்றத்தாழ்வு இனி நீடிக்காது என அமெரிக்க ஜனாதிபதி டொனால்டு டிரம்ப் எச்சரித்துள்ள நிலையில், இரு நாடுகளுக்கும் இடையிலான வர்த்தகப் போர் மேலும் தீவிரமடைந்துள்ளது.
அமெரிக்க டொலருடன் ஒப்பிடுகையில் கனேடிய டொலரின் மதிப்பில் காணப்படும் ஏற்றத்தாழ்வை ஏற்றுக்கொள்ள முடியாது என அமெரிக்க ஜனாதிபதி டொனால்டு டிரம்ப் கடுமையாக விமர்சித்துள்ளார். கனடாவின் டொலர் ஏற்றத்தாழ்வு பல ஆண்டுகளாகத் தொடர்வதாகவும், இனி அது நீடிக்காது எனவும் அவர் தனது ‘ட்ரூத் சோஷியல்’ (Truth Social) தளத்தில் பதிவிட்டுள்ளார்.
கடந்த 15 ஆண்டுகளில் கனேடிய டொலர் பெரும்பாலும் அமெரிக்க டொலரை விட பலவீனமாகவே காணப்படுகிறது. தற்போதைய நிலவரப்படி, ஒரு அமெரிக்க டொலரின் மதிப்பு 1.38 கனேடிய டொலராக உள்ளது. அதாவது, ஒரு கனேடிய டொலர் 72 அமெரிக்க சென்ட்களுக்கு மட்டுமே நிகரானது. இந்த நாணய மதிப்பு வேறுபாடு காரணமாக, கனேடியப் பொருட்கள் அமெரிக்க மக்களுக்கு மலிவாகவும், அமெரிக்கப் பொருட்கள் கனேடிய மக்களுக்கு அதிக விலையிலும் கிடைக்கின்றன.
இந்த நாணய மதிப்பு இடைவெளி இரு நாடுகளுக்கு இடையிலான வர்த்தகப் போரை மேலும் தீவிரப்படுத்தியுள்ளது. அண்மையில், கனடா பிரதமர் மார்க் கார்னி அமெரிக்காவுடனான வர்த்தகப் பேச்சுவார்த்தையை இடைநிறுத்தி, தமது பேச்சுவார்த்தைக் குழுவை வொஷிங்டனிலிருந்து திரும்ப அழைத்தார். இதற்குப் பதிலடியாக, கனேடியப் பொருட்களுக்கு அமெரிக்கா 50 சதவீத வரி விதித்தது.
இதற்குப் பதிலடி கொடுக்கும் வகையில், டொலருக்கு டொலர் என்ற அடிப்படையில் கனேடிய அரசு செப்டம்பர் 8 முதல் நடைமுறைக்கு வரும் வகையில் பதில் வரிகளை அறிவித்துள்ளது. இதற்கிடையே, நாணய ஏற்றத்தாழ்வு விவகாரத்தில் டிரம்ப் என்ன மாதிரியான நடவடிக்கைகளை முன்னெடுக்கவுள்ளார் என்பது குறித்து வெள்ளை மாளிகை எவ்வித கூடுதல் விளக்கத்தையும் இதுவரை அளிக்கவில்லை. இந்த வரி மற்றும் நாணயப் பிரச்சினைகள் அமெரிக்கா-கனடா உறவில் பெரும் பதற்றத்தை உருவாக்கியுள்ளன.
