சம்பள பாக்கி தகராறு: கடை உரிமையாளர் அடித்துக் கொலை, இருவர் கைது

புதுக்கோட்டை மாவட்டம் திருமயம் மெய்யப்பட்டியைச் சேர்ந்தவர் பிரபு. நாற்பத்து மூன்று வயதான இவர், அப்பகுதியில் உள்ள கடைவீதியில் பர்னிச்சர் கடை நடத்தி வந்தார்.

இவரது கடையில் கரூர் மாவட்டம் திட்டக்குடியைச் சேர்ந்த இருபத்தெட்டு வயதான அய்யாதுரை மற்றும் குளித்தலையைச் சேர்ந்த முப்பது வயதான கார்த்திக் ஆகியோர் தொழிலாளர்களாகப் பணியாற்றி வந்தனர். இவர்கள் இருவருக்கும் கடந்த சில மாதங்களாகப் பிரபு சம்பள பாக்கி வைத்திருந்ததாகவும், அதனை வழங்குவதில் தொடர்ந்து தாமதம் செய்து வந்ததாகவும் கூறப்படுகிறது.

இந்த நிலையில், சந்தைப்பேட்டையில் உள்ள பர்னிச்சர் குடோனில் பிரபு இருந்தபோது அங்கு வந்த அய்யாதுரையும் கார்த்திக்கும் தங்களுக்கான சம்பள பாக்கியைக் கேட்டுள்ளனர்.

அப்போது இரு தரப்பிற்கும் இடையே வாக்குவாதம் முற்றி கைகலப்பாக மாறியது. இதில் ஆத்திரமடைந்த தொழிலாளர்கள் இருவரும் தாங்கள் கைகளில் அணிந்திருந்த இரும்பு காப்புகளால் பிரபுவை பலமாகத் தாக்கியுள்ளனர். இதில் பலத்த காயமடைந்த பிரபு சம்பவ இடத்திலேயே சுருண்டு விழுந்த நிலையில், இருவரும் அங்கிருந்து தப்பிச் சென்றனர்.

அருகில் இருந்தவர்கள் உடனடியாக பிரபுவை மீட்டு திருமயம் அரசு மருத்துவமனைக்குக் கொண்டு சென்றனர். எனினும், அவர் ஏற்கனவே உயிரிழந்துவிட்டதாக மருத்துவர்கள் தெரிவித்தனர்.

இச்சம்பவம் தொடர்பாகப் பிரபுவின் குடும்பத்தினர் அளித்த புகாரின் பேரில் திருமயம் போலீசார் வழக்குப் பதிவு செய்து விசாரணை மேற்கொண்டனர். தொடர்ந்து தலைமறைவாக இருந்த அய்யாதுரை மற்றும் கார்த்திக் ஆகிய இருவரையும் போலீசார் கைது செய்து சிறையில் அடைத்தனர்.