கனடாவில் மூன்று உணவகங்களுக்கு தீவைத்த சம்பவம்; ஒருவர் அதிரடியாக கைது

கனடாவின் கால்கரியின் பெல்ட்லைன் பகுதியில் வாரங்கள் இடைவெளியில் நடந்த இரண்டு தீவைத்தல் சம்பவங்களுடன் தொடர்புடைய ஒருவரை Calgary Police Service கைது செய்துள்ளது. இந்த சம்பவங்களில் நகரின் மூன்று பிரபல உணவகங்களுக்கு கணிசமான சேதம் ஏற்பட்டுள்ளது.

முதல் தீவைத்தல் நவம்பர் 4 அன்று அதிகாலை 1.40 மணியளவில், 8 ஸ்ட்ரீட் மற்றும் 10 அவென்யூ தென்மேற்கு சந்திப்புக்கு அருகிலுள்ள பிரிட்ஜெட் பார் உணவகத்தின் பின்புற வழித்தடத்தில் நிகழ்ந்தது. 

அந்த நேரத்தில் உணவகம் மூடப்பட்டிருந்ததால் யாருக்கும் காயம் ஏற்படவில்லை. இருப்பினும், கழிப்பறை மற்றும் தனியார் உணவருந்தும் பகுதி தீயால் சேதமடைந்ததுடன், சேத மதிப்பு 2 லட்சம் முதல் 3 லட்சம் டாலர் வரை இருக்கும் என அதிகாரிகள் தெரிவித்தனர்.

இதனைத் தொடர்ந்து, டிசம்பர் 17 அன்று காலை 5 மணிக்கு முன்பு நடந்த மற்றொரு சம்பவத்தில், பின்புற வழித்தடம் வழியாக எழுந்ததாக நம்பப்படும் தீ, சால்ட் அண்ட் பிரிக் மற்றும் கிரெட்டா பார் ஆகிய உணவகங்களை பாதித்தது. சால்ட் அண்ட் பிரிக் உணவகத்தின் பின்புறத்தில் அமைந்துள்ள “சார்லீஸ் ஸ்பீக்கீஸி” பகுதி கடுமையாக சேதமடைந்ததுடன், தீ அடுத்துள்ள கிரெட்டா பாருக்கும் பரவியது.

இந்த இரண்டு சம்பவங்களும் ஒன்றோடொன்று தொடர்புடையவை என்றும், திட்டமிட்ட முறையில் தீ வைக்கப்பட்டதாகவும் போலீஸார் கூறுகின்றனர். இருப்பினும், இதற்கான காரணம் இதுவரை தெளிவாகவில்லை.

இந்த விசாரணையின் அடிப்படையில், 34 வயதுடைய ஆல்டின் கிரௌசைல்ட் என்பவர் சனிக்கிழமை கைது செய்யப்பட்டார். அவர்மீது நான்கு தீவைத்தல் குற்றச்சாட்டுகளும், பரோல் விதிமீறல் குற்றச்சாட்டும் பதிவு செய்யப்பட்டுள்ளது. தற்போது காவலில் உள்ள அவர், 2026 ஜனவரி 8 அன்று நீதிமன்றத்தில் ஆஜராக உள்ளார்.