37 ஆண்டுகளுக்குப் பிறகு மீண்டும் திரைக்கு வரும் 'கரகாட்டக்காரன்'! டிஜிட்டல் தொழில்நுட்பத்தில் ராமராஜனின் மெகா ஹிட் திரைப்படம்

தமிழ் சினிமா வரலாற்றில் மிகப்பெரிய வெற்றியைப் பெற்ற திரைப்படங்களில் ஒன்றான 'கரகாட்டக்காரன்', வெளியாகி 37 ஆண்டுகள் நிறைவடைந்துள்ள நிலையில் மீண்டும் திரையரங்குகளில் வெளியாகவுள்ளதாகத் தகவல் வெளியாகியுள்ளது.

நடிகர் ராமராஜன் மற்றும் கனகா நடிப்பில் 1989ஆம் ஆண்டு வெளியான இந்தத் திரைப்படம், தமிழ் ரசிகர்களின் மனதில் இன்றும் தனி இடத்தைப் பிடித்துள்ளது.

கிராமியக் கலை, காதல், நகைச்சுவை மற்றும் இசை ஆகியவற்றை மையமாகக் கொண்டு உருவான 'கரகாட்டக்காரன்', வெளியான காலத்தில் தமிழகம் முழுவதும் பெரும் வரவேற்பைப் பெற்றது.

இயக்குநர் கங்கை அமரன் இயக்கிய இந்தப் படத்தில் ராமராஜன், கனகா, கவுண்டமணி, செந்தில் உள்ளிட்ட பலர் முக்கிய கதாபாத்திரங்களில் நடித்திருந்தனர்.

தமிழகத்தின் பாரம்பரியக் கலைகளில் ஒன்றான கரகாட்டத்தைப் பின்னணியாகக் கொண்டு உருவான இந்தத் திரைப்படம், கிராமத்து மக்களின் வாழ்க்கை முறையையும் கலைஞர்களின் உணர்வுகளையும் சுவாரஸ்யமாக வெளிப்படுத்தியிருந்தது.

குறிப்பாக, ராமராஜன் மற்றும் கனகா இடையிலான காதல் காட்சிகளும், கவுண்டமணி - செந்தில் கூட்டணியின் நகைச்சுவைக் காட்சிகளும் ரசிகர்களிடம் மிகப்பெரிய வரவேற்பைப் பெற்றன.

படம் வெளியாகி 37 ஆண்டுகள் கடந்துள்ள நிலையிலும் கவுண்டமணி மற்றும் செந்திலின் நகைச்சுவைக் காட்சிகள் தொலைக்காட்சிகளிலும் சமூக ஊடகங்களிலும் தொடர்ந்து ரசிகர்களால் ரசிக்கப்பட்டு வருகின்றன.

'கரகாட்டக்காரன்' திரைப்படத்தின் மிகப்பெரிய வெற்றிக்கு இசைஞானி இளையராஜாவின் இசையும் முக்கிய காரணமாக அமைந்தது.

இந்தப் படத்தில் இடம்பெற்ற 'மாங்குயிலே பூங்குயிலே', 'இந்த மான் உந்தன் சொந்த மான்', 'ஊருவிட்டு ஊரு வந்து', 'குடகுமலை காற்றில்' உள்ளிட்ட பாடல்கள் ரசிகர்களிடையே பெரும் வரவேற்பைப் பெற்றன.

இளையராஜாவின் இசையில் உருவான பாடல்கள் இன்றும் தமிழ் சினிமாவின் மறக்க முடியாத பாடல்களாகக் கருதப்படுகின்றன.

மேலும், பழம்பெரும் நடிகை தேவிகாவின் மகளான கனகா, இந்தத் திரைப்படத்தின் மூலம் கதாநாயகியாகத் தமிழ் சினிமாவில் அறிமுகமானார்.

'கரகாட்டக்காரன்' திரைப்படத்தின் வெற்றிக்குப் பின்னர் கனகாவுக்கு அடுத்தடுத்து திரைப்பட வாய்ப்புகள் கிடைத்தன.

1989ஆம் ஆண்டு வெளியான இந்தப் படம் திரையரங்குகளில் பல்வேறு வசூல் சாதனைகளைப் படைத்தது.

குறிப்பாக, மதுரையிலுள்ள திரையரங்கொன்றில் மட்டும் 'கரகாட்டக்காரன்' திரைப்படம் 425 நாட்கள் தொடர்ந்து திரையிடப்பட்டதாகக் கூறப்படுகிறது.

அந்தக் காலகட்டத்தில் ஒரு திரைப்படம் ஓராண்டுக்கும் அதிகமாகத் திரையரங்கில் ஓடுவது மிகப்பெரிய சாதனையாகக் கருதப்பட்டது.

சுமார் 35 இலட்சம் இந்திய ரூபாய் செலவில் தயாரிக்கப்பட்டதாகக் கூறப்படும் இந்தப் படம், தயாரிப்பாளருக்குப் பல மடங்கு இலாபத்தைப் பெற்றுக்கொடுத்ததாகத் தெரிவிக்கப்படுகிறது.

மேலும், 1989ஆம் ஆண்டுக்கான தமிழக அரசின் சிறப்பு விருதையும் இந்தத் திரைப்படம் பெற்றிருந்தது.

இந்த நிலையில், 'கரகாட்டக்காரன்' திரைப்படத்தை நவீன டிஜிட்டல் தொழில்நுட்பத்தின் உதவியுடன் புதுப்பித்து மீண்டும் திரையரங்குகளில் வெளியிடுவதற்கான பணிகள் நடைபெற்று வருவதாகத் தகவல்கள் வெளியாகியுள்ளன.

புதிய பதிப்பில் திரைப்படத்தின் காட்சித் தரம் மேம்படுத்தப்படுவதுடன், சினிமாஸ்கோப் திரை அனுபவம் மற்றும் டிடிஎஸ் ஒலி தொழில்நுட்பத்துடன் வெளியிடத் திட்டமிடப்பட்டுள்ளதாகக் கூறப்படுகிறது.

இதன்மூலம் 1989ஆம் ஆண்டு திரையரங்குகளில் 'கரகாட்டக்காரன்' திரைப்படத்தைப் பார்த்த ரசிகர்கள் மீண்டும் பெரிய திரையில் அந்த அனுபவத்தைப் பெறுவதற்கான வாய்ப்பு உருவாகவுள்ளது.

அதேவேளை, இன்றைய இளம் தலைமுறை ரசிகர்களும் இந்தக் கிராமியத் திரைப்படத்தை நவீன திரையரங்கு அனுபவத்துடன் ரசிக்க முடியும் என எதிர்பார்க்கப்படுகிறது.

சமீபகாலமாகப் பழைய தமிழ் திரைப்படங்களை நவீன தொழில்நுட்பத்தில் புதுப்பித்து மீண்டும் திரையரங்குகளில் வெளியிடும் நடைமுறை அதிகரித்து வருகிறது.

அந்த வரிசையில் ராமராஜனின் 'கரகாட்டக்காரன்' திரைப்படமும் இணைவது தமிழ் சினிமா ரசிகர்களிடையே ஆர்வத்தை ஏற்படுத்தியுள்ளது.

திரைப்படத்தை மீண்டும் வெளியிடுவதற்கான தொழில்நுட்பப் பணிகள் நடைபெற்று வருவதாகக் கூறப்படும் நிலையில், அதிகாரப்பூர்வ வெளியீட்டுத் திகதி இன்னும் அறிவிக்கப்படவில்லை.

விரைவில் ரீ-ரிலீஸ் தொடர்பான அறிவிப்பு வெளியாகும் என எதிர்பார்க்கப்படுகிறது.

37 ஆண்டுகளுக்குப் பிறகு ராமராஜன், கனகா, கவுண்டமணி, செந்தில் ஆகியோரின் மறக்க முடியாத நடிப்பையும், இளையராஜாவின் இசையையும் மீண்டும் திரையரங்குகளில் ரசிக்க ரசிகர்கள் ஆவலுடன் காத்திருக்கின்றனர்.