பாபா வங்கா கணிப்பு: 2027-இல் உலகப் பணப்புழக்க நெருக்கடி... புதிய உச்சத்தை எட்டுமா தங்கம் விலை?

பல்கேரியாவைச் சேர்ந்த மறைந்த பார்வையற்ற தீர்க்கதரிசி பாபா வங்கா, 2027-ஆம் ஆண்டில் உலகம் கடுமையான பணப்புழக்க நெருக்கடியைச் சந்திக்கும் என்றும், அதன் காரணமாகத் தங்கத்தின் விலை முன்னெப்போதும் இல்லாத புதிய உச்சத்தை எட்டும் என்றும் கணித்துள்ளதாகத் தகவல்கள் வெளியாகியுள்ளன.

வங்கி அமைப்புகள் மீதான நம்பிக்கை சரியும்போது மக்கள் சேமிப்பைப் பாதுகாக்கத் தங்கத்தில் முதலீடு செய்வதால், இந்தியாவில் 10 கிராம் தங்கம் ரூ.2.1 லட்சம் முதல் ரூ.2.82 லட்சம் வரை உயரக்கூடும் என இணையத்தில் செய்திகள் பரவி வருகின்றன. எனினும், பாபா வங்கா தனது கணிப்புகளை எழுத்துப்பூர்வமாகப் பதிவு செய்யாததால், இவை உறுதிப்படுத்தப்படாத தகவல்கள் என வல்லுநர்கள் தெரிவிக்கின்றனர்.

அதேவேளையில், உலகின் முன்னணி பன்னாட்டு நிதி நிறுவனங்களின் பொருளாதாரக் கணிப்புகளும் தங்கத்தின் மதிப்பு கணிசமாக உயரும் என்பதையே உறுதிப்படுத்துகின்றன.

பிரபல முதலீட்டு வங்கியான ஜே.பி. மோர்கன், 2026-ஆம் ஆண்டின் இறுதிக் காலாண்டில் தங்கம் விலை அவுன்ஸுக்கு 6,000 டாலராகவும், 2027-ஆம் ஆண்டின் இறுதிக்குள் 6,300 டாலராகவும் (இந்திய மதிப்பில் 10 கிராம் ரூ.2.13 லட்சம்) உயரும் என மதிப்பிட்டுள்ளது. மேலும், யு.பி.எஸ் வங்கி 2027-ஆம் ஆண்டின் முற்பாதியில் அவுன்ஸுக்கு 5,000 டாலர் வரையிலும், டாய்ச் வங்கி 4,600 டாலர் வரையிலும் தங்கம் விலை உயர வாய்ப்புள்ளதாகக் கணித்துள்ளன.

புவிசார் அரசியல் பதற்றங்கள், பணவீக்க அச்சம், உலக நாடுகளின் மத்திய வங்கிகள் பெருமளவில் தங்கத்தைக் கையிருப்பில் சேமிப்பது மற்றும் அமெரிக்க ஃபெடரல் வங்கியின் வட்டி விகிதக் கொள்கை மாற்றங்கள் ஆகியவை இந்த விலை உயர்வுக்கு முக்கியக் காரணங்களாக அமைகின்றன.

தற்போது இந்தியச் சந்தையில் 24 கேரட் தங்கம் 10 கிராமிற்கு ரூ.1.46 லட்சம் முதல் ரூ.1.50 லட்சம் வரை வர்த்தகமாகி வருகிறது. செர்னோபில் விபத்து மற்றும் 9/11 தாக்குதல் உள்ளிட்ட பல வரலாற்று நிகழ்வுகளை பாபா வங்கா துல்லியமாகக் கணித்ததாகக் கூறப்பட்டாலும், 2027-ஆம் ஆண்டு தங்கம் விலை குறித்த தகவல்கள் சந்தைப் போக்கு மற்றும் ஊகங்கள் சார்ந்ததாகவே பார்க்கப்படுகிறது.