தூங்கும்போது கூட மேக்கப்.. எதார்த்தமே இல்ல: சீரியல் உலகை சாடிய 'சேது' அபிதா!

இயக்குநர் பாலாவின் காவியப் படைப்பான 'சேது' படத்தில் அபிதா குஜலாம்பாள் என்ற கதாபாத்திரத்தின் மூலம் தமிழ் நெஞ்சங்களில் நீங்கா இடம் பிடித்தவர் நடிகை அபிதா. ஜெனிலா என்ற பெயரில் சீரியல்களில் நடித்துக் கொண்டிருந்தவரை, வெள்ளித்திரைக்குக் கொண்டு வந்து 'அபிதா'வாக மாற்றியது சேது படம் தான்.

அதனைத் தொடர்ந்து சீறிவரும் காளை, உணர்ச்சிகள், அரசாட்சி என பல படங்களில் நடித்தார். இருப்பினும், வெள்ளித்திரையை விட சின்னத்திரை தான் இவருக்கு மிகப்பெரிய அடையாளத்தைக் கொடுத்தது. குறிப்பாக, 'திருமதி செல்வம்' தொடரில் இவர் ஏற்ற செல்வம் கதாபாத்திரம், இவரைத் தமிழ்நாட்டின் ஒவ்வொரு வீட்டிலும் ஒரு பெண்ணாக மாற்றியது. திருமணத்திற்குப் பிறகு நடிப்பிலிருந்து சற்று விலகியிருந்த அபிதா, தற்போது மீண்டும் சீரியல்களில் நடிக்கத் தொடங்கியுள்ளார்.

தற்போது ஜீ தமிழ் தொலைக்காட்சியில் 'சின்னஞ்சிறு கிளியே' என்ற தொடரில் நடித்து வரும் அபிதா, அண்மையில் அளித்த பேட்டி ஒன்றில் தற்போதைய சீரியல்களின் போக்கு குறித்துத் தனது அதிருப்தியை வெளிப்படுத்தியுள்ளார். "நாங்கள் நடித்த காலக்கட்டத்தில் சீரியல்கள் மிகவும் எதார்த்தமாக இருக்கும். கதாநாயகிகளுக்குப் பெரிய அளவில் மேக்கப் இருக்காது.

ஒரு சின்ன கம்மல், மஞ்சள் கயிறு, கண்ணாடி வளையல் என மிக எளிமையாகத் தான் நடித்தோம். அந்த எதார்த்தம் மக்கள் மனதில் எங்களை இன்னும் ஞாபகம் வைத்திருக்கச் செய்துள்ளது," என்று அவர் குறிப்பிட்டுள்ளார். பிரம்மாண்டத்தை விட கதையும், கதாபாத்திரத்தின் எதார்த்தமுமே முக்கியம் என்பதை அவர் வலியுறுத்தினார்.

இன்றைய காலகட்டத்தில் வரும் சீரியல்கள் அதீத பிரம்மாண்டத்துடன் எடுக்கப்படுவதாக அபிதா சாடியுள்ளார். "இப்போது வரும் சீரியல்களில் நடிகைகள் எப்போதும் கல்யாணத்திற்குச் செல்வது போலவே பிரம்மாண்டமான உடைகளுடனும், நகைகளுடனும் வலம் வருகிறார்கள். தூங்குவது போன்ற காட்சிகளில் கூட முழுமையான மேக்கப்புடன் (Makeup) இருப்பது எதார்த்தத்திற்கு முரணாக உள்ளது.

இது பார்ப்பவர்களுக்குச் செயற்கைத்தன்மையைத் தருகிறது," என்று அபிதா காட்டமாகப் பேசியுள்ளார். தொழில்நுட்ப வளர்ச்சி சீரியல்களின் தரத்தை உயர்த்தினாலும், எதார்த்தமான உணர்வுகளைக் கடத்துவதில் அவை தவறிவிடுகின்றனவோ என்ற கேள்வியை அபிதாவின் இந்தப் பேச்சு எழுப்பியுள்ளது.