பிரித்தானியா–அமெரிக்கா புதிய வர்த்தக உடன்பாடு: மருந்துகள் மீது ‘பூஜ்ஜிய வரி’ நடைமுறை

பிரித்தானியா மற்றும் அமெரிக்கா இடையே புதிய வர்த்தக ஒப்பந்தம் கையெழுத்தாகியுள்ளது. இந்த ஒப்பந்தத்தின் முக்கிய அம்சமாக, அமெரிக்காவிற்கு ஏற்றுமதி செய்யப்படும் பிரித்தானிய மருந்துப் பொருட்கள் மீது இனி பூஜ்ஜிய வரி (Zero Tariffs) மட்டுமே விதிக்கப்படும்.

சமீப மாதங்களில் அமெரிக்கா, பிரித்தானியாவைச் சேர்த்து ஐரோப்பிய நாடுகளின் மருத்துவப் பொருட்கள் மீது கூடுதல் வரி விதிக்கலாம் என்ற அச்சம் அதிகரித்திருந்தது. இந்த புதிய ஒப்பந்தம் அந்த பதட்டங்களுக்கு முடிவுக் கொண்டு வந்துள்ளது.

ஒப்பந்தத்தின்படி, அமெரிக்காவிற்கு மருந்துகள் ஏற்றுமதி செய்யும் நாடுகளில் ‘பூஜ்ஜிய வரி’ சலுகையைப் பெறும் முதல் நாடு பிரித்தானியா என அறிவிக்கப்பட்டுள்ளது.

அமெரிக்காவின் இந்த முடிவுக்கு பதிலளிக்கும் வகையில், பிரித்தானியா அரசு ஒரு பரஸ்பர நடவடிக்கையையும் அறிவித்துள்ளது. அதன்படி, தேசிய சுகாதார மற்றும் பராமரிப்பு சிறப்பு நிறுவனம் (NICE), தேசிய சுகாதார சேவை (NHS) புதிய மருந்துகளை மதிப்பிட பயன்படுத்தப்படும் செலவு–திறன் அடிப்படை வரம்பை 25% உயர்த்த ஒப்புக் கொண்டுள்ளது.

இதனால் புதிய மருந்துகள் NHS வழியாக விரைவாக அனுமதி பெறும் வாய்ப்பு கூடும் என வெளிநாட்டு ஊடகங்கள் தெரிவிக்கின்றன.