2030க்குள் 2.26 கோடி மரணங்கள்? நன்கொடை நிதி குறைப்பால் உருவாகும் பெரும் நெருக்கடி – ஆய்வு எச்சரிக்கை

அமெரிக்கா, பிரிட்டன், ஜெர்மனி மற்றும் பிரான்ஸ் உள்ளிட்ட முக்கிய நன்கொடையாளர் நாடுகள் பிற நாடுகளுக்கான அபிவிருத்தி நிதி உதவிகளை குறைத்து வருவது, உலகின் பல அபிவிருத்தி பெறும் நாடுகளில் பெரும் மனிதாபிமான பேரழிவை உருவாக்கக்கூடும் என்று புதிய ஆய்வு எச்சரிக்கிறது.

பார்சிலோனாவைச் சேர்ந்த ISGlobal – Global Health Institute வெளியிட்டுள்ள ஆய்வின்படி, வரவிருக்கும் நிதி குறைப்புகள் 2030க்குள் உலகளவில் 2.26 கோடி கூடுதல் மரணங்களை ஏற்படுத்தக்கூடும். இதில் ஐந்து வயதுக்குட்பட்ட 54 லட்சம் குழந்தைகளின் உயிரிழப்பும் இடம்பெறும் என குறிப்பிடப்பட்டுள்ளது.

கடந்த 30 ஆண்டுகளில் முதல் முறையாக அமெரிக்கா, பிரிட்டன், ஜெர்மனி, பிரான்ஸ் ஆகிய நாடுகள் தங்களின் அதிகாரப்பூர்வ அபிவிருத்தி நிதி உதவிகளை (ODA) குறைக்கும் முடிவுகளை எடுத்துள்ளன. கடந்த ஐந்து ஆண்டுகளாகவே நிதி குறைப்பு தொடர்ந்துவரும் நிலையில், இப்போது மேற்கொள்ளப்படும் மேலும் பல வெட்டுகள், ஏற்கனவே பாதிக்கப்பட்டுள்ள அபிவிருத்தி திட்டங்களை முற்றிலும் சீர்குலைக்கக்கூடும் என ஆய்வு எச்சரிக்கிறது.

93 குறைந்த மற்றும் நடுத்தர வருவாய் கொண்ட நாடுகளின் தரவுகளை அடிப்படையாகக் கொண்டு செய்த கணிப்பில், 5% முதல் 28% வரையிலான உதவி நிதி குறைப்பே, குறிப்பாக ஆபிரிக்கா மற்றும் மிக வறுமை நிலை நாடுகளில் அதிர்ச்சியூட்டும் உயிரிழப்பை ஏற்படுத்தும் என ஆய்வு தெரிவிக்கிறது.

அமெரிக்காவில் டொனால்ட் டிரம்ப் நிர்வாகத்தின் கீழ் USAID செயல்பாடுகளில் ஏற்பட்ட குறைப்புகள் அதிகரித்துள்ள நிலையில், மேற்கு ஐரோப்பிய நாடுகளும் இதேபோன்ற கடுமையான நிதி வெட்டுகளை மேற்கொண்டுள்ளன. சமீபத்தில் பிரிட்டன் 40%, பிரான்ஸ் 37%, நெதர்லாந்து 30%, பெல்ஜியம் 25% நிதி உதவியை குறைத்துள்ளன.

இந்த திடீர் நிதிநிலை மாற்றத்தின் காரணமாக, பல நாடுகளில் சுகாதாரம், கல்வி, வறுமை ஒழிப்பு போன்ற துறைகளில் கடந்த மூன்று தசாப்தங்களில் கிடைத்த முன்னேற்றங்கள் முழுமையாக பின்னடையக்கூடிய அபாயம் இருப்பதாக ஆய்வு முடிவுறுத்துகிறது.