ஈரான் மீதான தாக்குதல் 2 வாரங்களுக்கு நிறுத்தம்.. முடிவுக்கு வந்த போர்.. டிரம்ப் அறிவிப்பு
மத்திய கிழக்கை பதற்றத்தில் ஆழ்த்திய ஈரான்–அமெரிக்கா மோதலில் முக்கியமான திருப்பமாக, அமெரிக்க அதிபர் டிரம்ப் இரண்டு வாரங்களுக்கு போர் நிறுத்தம் அறிவித்துள்ளார்.
கடந்த மாதம் தொடங்கிய தாக்குதல்கள் தொடர்ந்து தீவிரமடைந்த நிலையில், இந்த இடைநிறுத்தம் சர்வதேச அளவில் கவனத்தை ஈர்த்துள்ளது. குறிப்பாக, ஈரான் மற்றும் அமெரிக்கா இடையேயான பதற்றம் உலக பொருளாதாரத்தையே பாதிக்கும் நிலையில் இருந்தது.
இந்த முடிவு, ஷெஹ்பாஸ் ஷெரீஃப் முன்வைத்த பேச்சுவார்த்தை முயற்சிகளின் விளைவாக ஏற்பட்டதாக தகவல்கள் தெரிவிக்கின்றன. இரு நாடுகளும் அடுத்த இரண்டு வாரங்களுக்கு தாக்குதல் நடத்தாமல் இருக்க ஒப்புக்கொண்டுள்ளன.
இதற்கான முக்கிய நிபந்தனையாக, அரபிக்கடலில் உள்ள ஹோர்முஸ் ஜலசந்தி வழியாக கப்பல் போக்குவரத்தை பாதுகாப்பாக திறக்க வேண்டும் என வலியுறுத்தப்பட்டுள்ளது.
போர் காரணமாக எண்ணெய் ஏற்றுமதி கடுமையாக பாதிக்கப்பட்டிருந்தது. குறிப்பாக வளைகுடா நாடுகளில் இருந்து கச்சா எண்ணெய் சர்வதேச சந்தைக்கு செல்ல முடியாத சூழல் உருவாகி, பல நாடுகளில் எரிபொருள் விலை உயர்வு மற்றும் பொருளாதார அழுத்தம் அதிகரித்தது. இந்நிலையில், இந்த போர் நிறுத்தம் உலக சந்தைக்கு ஒரு தற்காலிக நிம்மதியை அளிக்கும் என்று நிபுணர்கள் கருதுகின்றனர்.
இதற்கிடையில், ஈரான் தரப்பும் இந்த தற்காலிக போர் நிறுத்தத்தை உறுதிப்படுத்தியுள்ளது. எதிர்காலத்தில் நிரந்தர அமைதி ஒப்பந்தம் உருவாகும் வாய்ப்பு இருப்பதாகவும் கூறப்படுகிறது.
அடுத்த இரண்டு வாரங்கள் இந்த மோதலின் திசையை தீர்மானிக்கும் முக்கிய காலமாக பார்க்கப்படுகின்றன. உலக நாடுகள் அனைத்தும் இப்போது இந்த பேச்சுவார்த்தையின் முன்னேற்றத்தை தீவிரமாக கவனித்து வருகின்றன.
