மலைப்பாம்புடன் நடனம்: இளம்பெண்ணை கைது செய்ய நீதிமன்றம் அதிரடி உத்தரவு!
கொழும்பில் நடைபெற்ற நிகழ்ச்சி ஒன்றில் பாதுகாக்கப்பட்ட மலைப்பாம்புடன் நடனமாடிய குற்றச்சாட்டில், நெத்மி ஹிரண்யா என்ற பெண்ணைக் கைது செய்து நீதிமன்றத்தில் ஆஜர்ப்படுத்துமாறு உத்தரவிடப்பட்டுள்ளது.
கொழும்பு பகுதியில் அண்மையில் நடைபெற்ற 'புத்தாண்டு இளவரசன் மற்றும் இளவரசி' தெரிவுப் போட்டியின் போது அரங்கேறிய ஒரு விசித்திரமான நடனம் தற்போது சட்டச் சிக்கலில் முடிந்துள்ளது. இந்த நிகழ்வில் நெத்மி ஹிரண்யா என்ற இளம் பெண், பாதுகாக்கப்பட்ட இனத்தைச் சேர்ந்த ஒரு பெரிய மலைப்பாம்பைத் தனது கழுத்தில் சுற்றியபடி மேடையில் நடனமாடியுள்ளார்.
வனவிலங்கு மற்றும் தாவரப் பாதுகாப்பு கட்டளைச் சட்டத்தின் கீழ், மலைப்பாம்பு என்பது பாதுகாக்கப்பட்ட உயிரினமாக வகைப்படுத்தப்பட்டுள்ளது. இந்தச் சூழலில், சட்டத்திற்குப் புறம்பாக விலங்கைக் கையாண்டதாக எழுந்த புகாரை அடுத்து, கொழும்பு மேலதிக நீதவான் டி.ஜே. பிரேமரத்ன நேற்று (23) அந்தப் பெண்ணைக் கைது செய்ய உத்தரவிட்டார்.
வனவிலங்கு பாதுகாப்புத் திணைக்களம் நீதிமன்றத்தில் தாக்கல் செய்த முறைப்பாட்டில், பாதுகாக்கப்பட்ட உயிரினம் ஒன்றைத் தகுந்த அனுமதியின்றி வைத்திருந்ததும், அதற்குப் பாதிப்பு ஏற்படும் வகையில் பொதுவெளியில் கையாண்டதும் கடுமையான குற்றமாகும் எனச் சுட்டிக்காட்டப்பட்டுள்ளது.
பொழுதுபோக்கு நோக்கத்திற்காக ஊர்வன வகை விலங்குகளை இத்தகைய ஆபத்தான முறையில் பயன்படுத்துவது சட்டப்படி தண்டனைக்குரியது என்பதை அதிகாரிகள் நீதிமன்றத்தில் வலியுறுத்தினர். இதனை ஏற்றுக்கொண்ட நீதவான், சம்பந்தப்பட்ட பெண்ணைக் உடனடியாகக் கைது செய்து நீதிமன்றத்தில் முன்னிலைப்படுத்துமாறு பாதுகாப்புத் துறையினருக்குக் கட்டளையிட்டார்.
இந்த விவகாரம் தொடர்பாக அந்தப் போட்டியை ஏற்பாடு செய்த பிரபல அழகுக்கலை நிபுணர் சந்திமால் ஜயசிங்கவிடமும் தீவிர விசாரணை நடத்த நீதிமன்றம் அனுமதி வழங்கியுள்ளது. அவரிடம் விரிவான வாக்குமூலம் ஒன்றைப் பதிவு செய்ய வனவிலங்கு அதிகாரிகளுக்கு உத்தரவிடப்பட்டுள்ளது.
விலங்குகளைக் காட்சிப் பொருளாக மாற்றுவதைத் தடுக்கவும், வனவிலங்கு பாதுகாப்புச் சட்டத்தின் முக்கியத்துவத்தை வலியுறுத்தவும் இந்த நடவடிக்கை எடுக்கப்பட்டுள்ளதாகத் தெரிகிறது.
