3 திருமணங்கள், 3 விவாகரத்துகள்: மகிழ்ச்சியாக வாழும் பிரபல நடிகை!
தென்னிந்திய திரையுலகில் பரிச்சயமான நடிகையாக விளங்கும் மீரா வாசுதேவன், தனது தனிப்பட்ட வாழ்க்கை காரணமாக சமீபத்தில் மீண்டும் கவனத்தை ஈர்த்துள்ளார். தமிழ், மலையாளம், தெலுங்கு மற்றும் இந்தி படங்களில் நடித்துள்ள இவர், தற்போது சீரியல் உலகில் அதிகமாக கவனம் செலுத்தி வருகிறார்.
மும்பையில் பிறந்து வளர்ந்த மீரா, முதலில் மாடலிங் துறையில் அறிமுகமானார். பின்னர் 2003ஆம் ஆண்டு இந்தி படத்தின் மூலம் திரையுலகில் காலடி எடுத்து வைத்தார். அதன் பிறகு தெலுங்கு மற்றும் தமிழ் படங்களில் நடித்தார். தமிழில் உன்னை சரணடைந்தேன் படத்தின் மூலம் அறிமுகமான இவர், யாவரும் நலம், அடங்க மறு போன்ற படங்களில் நடித்ததன் மூலம் ரசிகர்களுக்கு நன்கு அறிமுகமானார்.
தற்போது அவர் சீரியல் துறையில் பிஸியாக உள்ளார். தமிழில் பல தொடர்களில் நடித்த இவர், இப்போது மலையாளத்தில் “அஞ்சு சுந்தரிகள்” தொடரில் முக்கிய கதாபாத்திரத்தில் நடித்துவருகிறார்.
மீரா வாசுதேவனின் தனிப்பட்ட வாழ்க்கை பல திருப்பங்களை சந்தித்துள்ளது. 2005ஆம் ஆண்டு விஷால் அகர்வாலை திருமணம் செய்த அவர், 2010ஆம் ஆண்டு விவாகரத்து பெற்றார். அதன் பின்னர் ஜான் கொக்கேன் என்பவரை 2012ஆம் ஆண்டு திருமணம் செய்து கொண்டார். இவர்களுக்கு ஒரு மகன் உள்ளார். ஆனால் இந்த திருமணமும் நீடிக்காமல், 2016ஆம் ஆண்டு இருவரும் பிரிந்தனர்.
பின்னர் 2024ஆம் ஆண்டு விபின் புதுயாங்கம் என்பவரை திருமணம் செய்து கொண்டார். ஆனால் இந்த உறவும் ஒரு ஆண்டுக்குள் முடிவுக்கு வந்து, மூன்றாவது விவாகரத்தையும் அவர் சந்தித்தார்.
சமீபத்திய நேர்காணலில் தனது வாழ்க்கை குறித்து திறந்த மனதுடன் பேசிய மீரா, தற்போது மிகவும் அமைதியான மற்றும் தெளிவான மனநிலையுடன் இருப்பதாக தெரிவித்துள்ளார். தனது வாழ்க்கையில் எடுத்த முடிவுகளை ஏற்றுக்கொண்டு முன்னோக்கி செல்ல விரும்புவதாகவும் கூறினார். தவறான தகவல்கள் பரவாமல் இருக்க தான் தனது விவாகரத்து குறித்து சமூக வலைதளங்களில் வெளிப்படையாக பகிர்ந்ததாகவும் அவர் தெரிவித்தார்.
மேலும், வாழ்க்கையில் அனுபவங்கள் தான் நம்மை உருவாக்குகின்றன என்றும், தனிப்பட்ட நிம்மதி மிகவும் முக்கியம் என்றும் அவர் வலியுறுத்தினார். தனது குடும்பத்தினருடன், குறிப்பாக மகனுடன் கொண்டுள்ள நெருக்கமான உறவு தான் தன்னுக்கு பெரிய ஆதரவாக இருப்பதாகவும் கூறினார்.
தற்போது தனது பணியில் கவனம் செலுத்தி, குடும்பத்துடன் மகிழ்ச்சியாக வாழ்ந்து வருவதாக மீரா வாசுதேவன் தெரிவித்துள்ளார்.
