சாப்பிடும் நேரமும் உடல் எடையும்: அதிர்ச்சி தரும் ஆய்வு முடிவுகள் – உணவு நேரத்தில் இந்த மாற்றங்கள் அவசியம்!

நாம் என்ன உணவு சாப்பிடுகிறோம் என்பது மட்டுமல்லாமல், எந்த நேரத்தில் உணவு எடுத்துக்கொள்கிறோம் என்பதும் உடல் எடை, இரத்தச் சர்க்கரை மற்றும் இதய ஆரோக்கியத்தில் குறிப்பிடத்தக்க தாக்கத்தை ஏற்படுத்தும் என்று சமீபத்திய ஆய்வுகள் தெரிவிக்கின்றன. உணவின் தரத்துடன், உணவு நேரமும் சமமாக முக்கியமானது என்பதை சர்வதேச ஊடகம் ஒன்று வெளியிட்ட செய்தி உறுதிப்படுத்தியுள்ளது.

உயிரியல் கடிகாரத்தின் பங்கு:

உடலின் உயிரியல் கடிகாரம் எனப்படும் Circadian Rhythm, தூக்கம், பசி, செரிமானம் மற்றும் வளர்சிதை மாற்றம் உள்ளிட்ட பல்வேறு உடல் செயற்பாடுகளை கட்டுப்படுத்துகிறது. இந்த இயற்கையான 24 மணி நேர சுழற்சியுடன் நாம் உணவு உட்கொள்ளும் நேரம் ஒத்துப்போகும்போது, உடல் ஆரோக்கியமாகச் செயல்படுகிறது. அது மாறும்போது, பல்வேறு உடல்நலப் பிரச்சனைகள் உருவாகின்றன.

மதிய உணவு நேரத்தின் முக்கியத்துவம்:

ஸ்பெயினில் 420 பேரிடம் மேற்கொள்ளப்பட்ட ஒரு ஆய்வில், ஒரே உணவுமுறையைப் பின்பற்றியவர்களில், மதிய உணவை முன்கூட்டியே (பிற்பகல் 1 மணிக்கு முன்) எடுத்துக்கொண்டவர்கள், தாமதமாக (பிற்பகல் 3 மணிக்குப் பின்) உட்கொண்டவர்களை விட அதிக எடையையும் வேகமாகக் குறைத்துள்ளனர் என கண்டறியப்பட்டுள்ளது. அதேபோல், தாமதமாக மதிய உணவு உட்கொண்டவர்களுக்கு நீரிழிவுக் கட்டுப்பாடு பாதிக்கப்பட்டதுடன், கார்போஹைட்ரேட்டுகளை எரிக்கும் உடலின் திறனும் கணிசமாகக் குறைந்ததாக மற்றொரு ஆய்வில் தெரியவந்துள்ளது.

இரவு உணவின் எதிர்மறை விளைவுகள்:

இரவு நேரத்தில் உடல் தூக்கத்திற்குத் தயாராகும்போது, மெலட்டோனின் என்ற ஹார்மோன் அதிகரிக்கிறது. இந்த ஹார்மோன், அந்த நேரத்தில் உணவு உட்கொள்ளும்போது குளுக்கோஸ் கட்டுப்பாட்டை பாதிக்கக்கூடும் என ஆய்வாளர்கள் தெரிவிக்கின்றனர். மேலும், தாமதமாக உணவு உட்கொள்வது அடுத்த நாள் அதிக பசியை ஏற்படுத்தும். இதனால் அதிக அளவில் உணவு உட்கொள்ளும் நிலை ஏற்படுவதுடன், உடலில் கொழுப்பு சேமிக்கப்படும் வாய்ப்பும் அதிகரிக்கிறது.

காலை உணவும் இதய ஆரோக்கியமும்:

பிரான்ஸில் சுமார் ஒரு லட்சத்துக்கும் அதிகமானோரிடம் மேற்கொள்ளப்பட்ட மிகப் பெரிய ஆய்வில், தாமதமாக காலை உணவு உட்கொண்டவர்களுக்கு இதய நோய்கள் ஏற்படும் அபாயம் கணிசமாக அதிகமாக இருப்பது கண்டறியப்பட்டுள்ளது. அதாவது, சீக்கிரமாக காலை உணவை சாப்பிடும் பழக்கம் இதய ஆரோக்கியத்தைப் பாதுகாக்க உதவுகிறது.

நிபுணர்களின் பரிந்துரைகள்:

உணவு நேரத்தில் சில எளிய மாற்றங்களை மேற்கொள்வது மிகவும் பயனுள்ளதாக இருக்கும் என நிபுணர்கள் தெரிவிக்கின்றனர்.

காலை மற்றும் மதிய உணவை போதுமான அளவில் எடுத்துக்கொள்வதுடன், நார்ச்சத்து நிறைந்த உணவுகளை பகல் நேரத்தில் அதிகம் சேர்த்துக்கொள்ளவும் பரிந்துரைக்கப்படுகிறது.

இரவு உணவை இலகுவாக வைத்துக்கொள்ள வேண்டும்.

இரவு உணவை உறங்குவதற்கு குறைந்தது மூன்று மணி நேரத்திற்கு முன்பாக முடித்துக்கொள்வது உடலின் இயற்கையான உயிரியல் கடிகாரத்துடன் சிறப்பாக ஒத்துப்போகும்.

எனவே, ஆரோக்கியமான உணவுமுறை என்பது "என்ன சாப்பிடுகிறோம்?" என்பதுடன், "எப்போது சாப்பிடுகிறோம்?" என்பதையும் கருத்தில் கொண்டதாக இருக்க வேண்டும். இந்த இரண்டு காரணிகளையும் ஒருங்கிணைத்து பின்பற்றுவதன் மூலம், உடல் எடை குறைப்பு முதல் நீரிழிவு மற்றும் இதய நோய் அபாயத்தைக் குறைப்பது வரை பல நன்மைகளைப் பெறலாம்.