கார் கிணற்றில் விழுந்து 4 பேர் பலி: உயிரிழந்தோர் குடும்பங்களுக்கு தலா ரூ. 3 லட்சம் நிவாரணம் - முதல்வர் அறிவிப்பு!

விழுப்புரம் மாவட்டம் செஞ்சி அருகே காரொன்று கிணற்றுக்குள் விழுந்து விபத்துக்குள்ளானதில் உயிரிழந்த நான்கு நபர்களின் குடும்பங்களுக்கு தலா ரூ. 3 லட்சம் நிவாரண உதவி வழங்க தமிழக முதலமைச்சர் மு.க. ஸ்டாலின் உத்தரவிட்டுள்ளார்.

கடந்த மார்ச் 3-ஆம் தேதி காலை, புதுவை - கிருஷ்ணகிரி தேசிய நெடுஞ்சாலையில் ஆலம்பூண்டி கிராமம் அருகே சென்றுகொண்டிருந்த கார், எதிர்பாராதவிதமாக கட்டுப்பாட்டை இழந்து சாலையோரமிருந்த தனியார் கிணற்றுக்குள் பாய்ந்தது. இந்த விபத்தில் காரில் பயணித்த சென்னையைச் சேர்ந்த ராஜா (44), வினோத் (39), ஜெயமுருகன் (43) மற்றும் சேகர் (27) ஆகிய நான்கு பேரும் கிணற்று நீரில் மூழ்கி பரிதாபமாக உயிரிழந்தனர்.

இந்தத் துயரச் செய்தியைக் கேட்டு மிகுந்த வேதனையடைந்ததாகத் தெரிவித்துள்ள முதலமைச்சர் மு.க. ஸ்டாலின், உயிரிழந்தவர்களின் குடும்பத்தினருக்கு தனது ஆழ்ந்த இரங்கலைத் தெரிவித்துள்ளார். மேலும், பாதிக்கப்பட்ட குடும்பங்களுக்கு முதலமைச்சரின் பொது நிவாரண நிதியிலிருந்து தலா ரூ. 3 லட்சம் நிதியுதவி உடனடியாக வழங்கிடவும் அவர் ஆணையிட்டுள்ளார்.