15 வயதில் புதிய வரலாறு: சச்சின், ஷெஃபாலி சாதனைகளை முறியடித்த வைபவ் சூர்யவன்ஷி

இந்திய கிரிக்கெட் அணியின் இளம் நட்சத்திரமான வைபவ் சூர்யவன்ஷி, இங்கிலாந்துக்கு எதிரான இரண்டாவது டி20 சர்வதேச போட்டியில் அறிமுகமாகி புதிய வரலாற்றை படைத்துள்ளார்.

மென்செஸ்டரில் நடைபெற்ற இந்தப் போட்டியின் மூலம், 15 ஆண்டுகள் 99 நாட்கள் வயதில் இந்தியாவுக்காக சர்வதேச கிரிக்கெட்டில் அறிமுகமான இளம் வீரர் என்ற பெருமையை அவர் பெற்றுள்ளார்.

இந்த சாதனையின் மூலம், இந்திய ஆண்கள் கிரிக்கெட்டில் சச்சின் டெண்டுல்கர் (16 ஆண்டுகள் 205 நாட்கள்) வைத்திருந்த இளம் வயது அறிமுக சாதனையையும், இந்திய மகளிர் கிரிக்கெட்டில் ஷெஃபாலி வர்மா (15 ஆண்டுகள் 239 நாட்கள்) படைத்திருந்த சாதனையையும் வைபவ் சூர்யவன்ஷி முறியடித்துள்ளார்.

இதன் மூலம், இந்திய கிரிக்கெட் வரலாற்றில் ஆண்கள் மற்றும் பெண்கள் அணிகளை சேர்த்து பார்க்கும்போது, மிக இளம் வயதில் சர்வதேச போட்டியில் களமிறங்கிய வீரர் என்ற புதிய சாதனையை அவர் தனது பெயரில் பதிவு செய்துள்ளார்.

இந்தப் போட்டிக்கு முன், இந்திய அணியின் வீரர் திலக் வர்மா, வைபவ் சூர்யவன்ஷிக்கு அறிமுகத் தொப்பியை (Debut Cap) வழங்கினார். அந்த தருணம் ரசிகர்களிடையே பெரும் வரவேற்பைப் பெற்றது.

சமீபத்தில் நிறைவடைந்த இந்தியன் பிரீமியர் லீக் (ஐபிஎல்) தொடரிலும் வைபவ் சூர்யவன்ஷி அபார ஆட்டத்தை வெளிப்படுத்தியிருந்தார். ராஜஸ்தான் ராயல்ஸ் அணிக்காக விளையாடிய அவர், 776 ஓட்டங்கள் குவித்து ஆரஞ்சு காப் வென்றதுடன், வளர்ந்து வரும் வீரர் மற்றும் தொடரின் சிறந்த வீரர் (MVP) உள்ளிட்ட பல விருதுகளையும் கைப்பற்றியிருந்தார்.

சர்வதேச கிரிக்கெட்டில் அறிமுகமான முதல் போட்டியிலேயே புதிய வரலாறு படைத்துள்ள வைபவ் சூர்யவன்ஷிக்கு ரசிகர்கள் மற்றும் முன்னாள் கிரிக்கெட் வீரர்கள் வாழ்த்துகளைத் தெரிவித்து வருகின்றனர்.