சத்தமின்றி தம்பியின் திருமணம்: தொகுப்பாளினி டிடி பகிர்ந்த மகிழ்ச்சியான நொடிகள்
இந்த திருமணம் மிகவும் அமைதியாகவும், நெருங்கிய உறவினர்கள் மட்டும் பங்கேற்ற ஒரு சிறிய விழாவாக நடைபெற்றது. தர்ஷன், கிர்கிஸ்தானைச் சேர்ந்த அஜார் என்பவரை மணந்து கொண்டார்.
பிரபல தமிழ் தொலைக்காட்சி தொகுப்பாளினி டிடி (திவ்யதர்ஷினி) அவரது தம்பி தர்ஷனின் திருமண புகைப்படங்களை இன்ஸ்டாகிராமில் பகிர்ந்து ரசிகர்களிடம் இருந்து பெரும் வாழ்த்துகளைப் பெற்று வருகிறார்.
இந்த திருமணம் மிகவும் அமைதியாகவும், நெருங்கிய உறவினர்கள் மட்டும் பங்கேற்ற ஒரு சிறிய விழாவாக நடைபெற்றது. தர்ஷன், கிர்கிஸ்தானைச் சேர்ந்த அஜார் என்பவரை மணந்து கொண்டார். இது குறித்து டிடி தனது இன்ஸ்டாகிராம் பதிவில், “எங்கள் தம்பி இன்று காலை ஒரு நெருக்கமான திருமண விழாவில் திருமணம் செய்து கொண்டார். தர்ஷனுக்கும் அஜாருக்கும் உங்கள் ஆசிகளைப் பொழியுங்கள்,” என்று உணர்ச்சிபூர்வமாக எழுதியுள்ளார்.
20 ஆண்டுகளுக்கும் மேலாக ‘காபி வித் டிடி’, ‘ஜோடி நம்பர் ஒன்’, ‘சூப்பர் சிங்கர்’ போன்ற நிகழ்ச்சிகளின் மூலம் தமிழ் பார்வையாளர்களின் அன்பையும் மதிப்பையும் பெற்ற டிடி, தனது இயல்பான பேச்சு, நகைச்சுவை மற்றும் செலிப்ரிட்டிகளுடன் இயல்பாக உரையாடும் திறனால் இன்றளவும் முன்னணி தொகுப்பாளினியாக திகழ்கிறார்.
அவர் பகிர்ந்த திருமண புகைப்படங்கள் சமூக ஊடகங்களில் வைரலாகி, ரசிகர்கள் மற்றும் பிரபலங்கள் பலரும் தம்பி-மருமகள் இருவருக்கும் வாழ்த்துகளைத் தெரிவித்து வருகின்றனர்.
