தூங்கி எழுந்தவுடன் என்ன பார்க்கக் கூடாது? ஜோதிடமும் வாஸ்துவும் சொல்லும் எச்சரிக்கைகள்
காலை கண் திறந்தவுடன் நாம் முதலில் என்ன செய்கிறோம்? பலருக்கும் அது நேரத்தை பார்க்கும் பழக்கமாக இருக்கும். முன்பு சுவர் கடிகாரத்தை பார்த்து நேரம் தெரிந்துகொண்டாலும், இப்போது பெரும்பாலானோர் கைப்பேசியை எடுத்தே நேரம் பார்க்கின்றனர். இந்த சாதாரண பழக்கத்திற்கே ஜோதிடம் மற்றும் வாஸ்து சாஸ்திரத்தில் சில விளக்கங்கள் உள்ளன என்று வேத ஜோதிட நிபுணர்கள் கூறுகின்றனர்.
அவர்கள் கருத்துப்படி, காலை எழுந்தவுடன் நாம் முதலில் பார்க்கும் பொருட்கள் அந்த நாளின் மனநிலையையும் செயல்பாடுகளையும் பாதிக்கக்கூடும். சில பொருட்கள் நல்ல ஆற்றலை தரலாம்; சிலவை எதிர்மறை தாக்கத்தையும் ஏற்படுத்தலாம்.
கடிகாரத்தைப் பார்ப்பது தவறில்லை. ஆனால் அது இயங்கிக் கொண்டிருக்க வேண்டும் என்பதையே நிபுணர்கள் வலியுறுத்துகின்றனர். ஓடாத அல்லது உடைந்த கடிகாரத்தை காலை எழுந்தவுடன் பார்க்கக் கூடாது என கூறப்படுகிறது. அப்படிப் பார்க்கும் போது வேலைகளில் தாமதம், திட்டங்களில் தடைகள், பணியிட சிக்கல்கள் மற்றும் நிதி பிரச்சனைகள் அதிகரிக்கலாம் என்ற நம்பிக்கை உள்ளது. இதற்கு பரிகாரமாக, கடிகாரத்தை உடனே சரிசெய்து, தினமும் சூரிய நமஸ்காரம் செய்வது நல்ல பலன் தரும் என கூறப்படுகிறது.
அதேபோல், காலை எழுந்தவுடன் தன் நிழலை பார்ப்பதும் தவிர்க்கப்பட வேண்டியதாக கூறப்படுகிறது. சூரிய ஒளி அல்லது மின் விளக்கின் ஒளியில் தோன்றும் நிழலை முதலில் பார்க்கும் போது மன அழுத்தம், பதட்டம் போன்றவை அதிகரிக்கலாம் என நம்பப்படுகிறது. தவிர்க்க முடியாமல் பார்த்தால், சூரிய பகவானுக்கு நீர் அர்ப்பணித்து ‘ஓம் சூரியாய நமஹ’ என்ற மந்திரத்தை 11 முறை ஜபிக்கலாம் என்று பரிந்துரைக்கப்படுகிறது.
படுக்கையறையில் உடைந்த கண்ணாடி இருப்பதும், அதைப் பார்த்து நாளைத் தொடங்குவதும் நல்லதல்ல என வாஸ்து நிபுணர்கள் கூறுகின்றனர். இது குடும்பத்தில் மனஸ்தாபம், குறிப்பாக தம்பதியருக்குள் புரிதல் குறைவு போன்ற பிரச்சனைகளை உருவாக்கும் என நம்பப்படுகிறது. எனவே, உடைந்த கண்ணாடிகளை உடனே அகற்றுவது சிறந்தது.
இரவில் பயன்படுத்திய பாத்திரங்களை சுத்தம் செய்யாமல் படுக்கைக்கு அருகில் வைப்பதும் தவறானதாக கருதப்படுகிறது. அடுத்த நாள் காலை அதை முதலில் பார்ப்பது கடன் சுமை மற்றும் தேவையற்ற செலவுகளை அதிகரிக்கும் என நம்பிக்கை உள்ளது. அதனால், இரவே பாத்திரங்களை சுத்தம் செய்து வைப்பது நல்லது. மேலும், தினமும் காலை லட்சுமி தேவிக்கு பூஜை செய்வது வளம் தரும் என கூறப்படுகிறது.
காலை எழுந்தவுடன் அடுத்தவர்களின் சண்டை, வாக்குவாதங்களை காண்பதும் அல்லது கேட்பதும் மன அமைதியை குலைக்கக்கூடும். அந்த நாள் முழுவதும் குழப்பமான மனநிலையில் இருக்க நேரிடலாம். இதை சமாளிக்க ‘ஓம் சாந்தி’ மந்திரத்தை மனதளவில் உச்சரித்து அமைதியை நிலைநிறுத்தலாம் என நிபுணர்கள் பரிந்துரைக்கின்றனர்.
மொத்தத்தில், காலை நேரம் நாளின் திசையை நிர்ணயிக்கும் முக்கியமான தருணமாக கருதப்படுகிறது. எனவே, அந்த நேரத்தை அமைதியாகவும் நேர்மறையாகவும் தொடங்குவது வாழ்க்கையில் நல்ல மாற்றங்களை ஏற்படுத்தும் என ஜோதிட மற்றும் வாஸ்து நம்பிக்கைகள் வலியுறுத்துகின்றன.
