மரணம் நெருங்கும் போது உடலிலும் மனதிலும் தோன்றும் அறிகுறிகள் என்ன தெரியுமா?

இந்து மதத்தில் பதினெட்டு புராணங்களில் ஒன்றான கருட புராணம், மனித வாழ்க்கை, இறப்புக்குப் பின்னான உலகம், பாவ-புண்ணியங்களின் விளைவுகள், சொர்க்கம், நரகம், தர்மம் மற்றும் விதிகள் போன்ற ஆழமான கருத்துகளை விரிவாக விளக்குகிறது. முக்கியமாக, ஒருவர் இறக்கும் முன் அவருக்கு முன்கூட்டியே தோன்றும் அறிகுறிகள் குறித்தும் இந்த புராணம் விளக்கமளிக்கிறது.

கருட புராணத்தின் படி, மரணம் ஒருவரை நெருங்கும் போது, அவரது உடல், மனம் மற்றும் உணர்வுகளில் பல அசாதாரணமான மாற்றங்கள் ஏற்படுகின்றன. இந்த அறிகுறிகள் சில நாட்களுக்கு முன்பிருந்தே தொடங்கி, மரண நேரத்தை நெருங்க நெருங்க தெளிவாக வெளிப்படுகின்றன.

அதன்படி, ஒருவரால் தனது மூக்கைப் பார்க்க முடியாமல் போவது முதல் அறிகுறியாகக் கூறப்படுகிறது. இது உடலின் உணர்வுத் திறன் மங்குவதைக் குறிக்கிறது.

மேலும், மரணம் நெருங்கும் போது, ஒருவரால் எண்ணெய் அல்லது தண்ணீரில் தனது நிழலைக் காண முடியாது என்று கருட புராணம் குறிப்பிடுகிறது. இது பாரம்பரியமாக “நிழல் பிரிதல்” என்று கருதப்படுகிறது.

உடலின் மற்றொரு அறிகுறியாக, கை ரேகைகள் மங்கி, சில சமயங்களில் முற்றிலும் மறைந்துவிடுவதும் கூறப்படுகிறது. இது பொதுவாக மரணத்திற்கு சில நாட்களுக்கு முன்பே நிகழ்கிறது.

கனவுகளிலும் மாற்றங்கள் ஏற்படுகின்றன. அணைந்துபோன விளக்கு, கருப்பு நிறப் பறவைகள், தண்ணீரில் மூழ்குதல் போன்ற விசித்திரமான கனவுகள் தொடர்ந்து வரலாம். இவை மரணத்தின் அணுகுமுகமாக கருதப்படுகின்றன.

மேலும், இறப்பதற்கு முன் ஒருவர் தன்னைச் சுற்றி மறைந்த ஆன்மாக்களை உணரத் தொடங்குவார். இவை பெரும்பாலும் அவரது மூதாதையர்களின் ஆன்மாக்களாக இருக்கலாம். இந்த ஆன்மாக்கள், அவர் விரைவில் மறுவுலகத்திற்கு வரப்போவதால், அவரை வரவேற்க வந்து நிற்பதாக நம்பப்படுகிறது. இதனால் தான், இறக்கும் நேரத்தில் சிலர் "இறந்தவர்களைப் பார்க்கிறேன்" என்று கூறுவது வழக்கம்.

கருட புராணம் மேலும் கூறுவது என்னவென்றால், மரணம் நெருங்கும்போது சுவாசம் எதிர்த் திசையில் ஓடத் தொடங்குகிறது. இது ஆன்மா உடலை விட்டு வெளியேறும் முன்னோடியாகக் கருதப்படுகிறது. அதே நேரத்தில், அவர் எமதூதர்களை அருகில் காண்பதால், உண்மையான உலகத்தில் உள்ள உறவினர்களைக் கூட பார்க்க முடியாமல் போகலாம்.

இந்த அறிகுறிகள் அனைத்தும் மரணம் ஒரு இயற்கையான மாற்றம் என்பதையும், அதற்கு முன் ஆன்மா மற்றும் உடல் இடையே ஒரு மெதுவான பிரிவு நிகழ்கிறது என்பதையும் உணர்த்துகின்றன.

(பொறுப்புத் துறப்பு: இந்த தகவல் கருட புராணம் மற்றும் நம்பிக்கைகளின் அடிப்படையில் தொகுக்கப்பட்டுள்ளது. இது ஆன்மீக மற்றும் பாரம்பரிய நோக்கங்களுக்காக மட்டுமே. மருத்துவ அல்லது உளவியல் ரீதியான முடிவுகளுக்கு தொடர்புடைய நிபுணர்களை அணுகவும்.)