காருக்குள் சடலமாக மீட்கப்பட்ட வைத்தியர்; அக்காவாக மாறிய மனைவி; யாழில் சிக்கிய சந்தேகநபர்களிடம் அதிர்ச்சி தகவல்!

தெல்தெனியவில் காருக்குள் சடலமாக மீட்கப்பட்ட இயன்முறை சிகிச்சையாளர் (பிசியோதெரபிஸ்ட்) கொலை வழக்கில் கைதான சந்தேகநபர்கள் அனைவரும் மேலதிக விசாரணைகளுக்காக நேற்றிரவு (ஜூன் 24) நுவரெலியா பொலிஸ் நிலையத்திற்கு அழைத்து வரப்பட்டனர்.

கடந்த ஜூன் 17 ஆம் தேதி, தெல்தெனிய பகுதியில் நிறுத்தி வைக்கப்பட்டிருந்த கார் ஒன்றினுள் இருந்து பெண்ணொருவரின் சடலம் பொலிஸாரால் மீட்கப்பட்டது. இந்த சம்பவம் தொடர்பில் விசாரணை நடத்திய பொலிஸார், உயிரிழந்த பெண்ணின் காதலனே சடலத்தை காருக்குள் வைத்து விட்டு தப்பிச் சென்றது சிசிடிவி காட்சிகளில் பதிவாகியிருந்தது கண்டுபிடிக்கப்பட்டது.

7 நாட்களாக சந்தேகநபரை தேடும் பணியில், வலான மத்திய ஊழல் தடுப்புப் பிரிவு மற்றும் குற்றப் புலனாய்வுத் திணைக்களத்தின் தொழில்நுட்ப உதவியுடன் மேற்கொள்ளப்பட்ட தேடுதலில், சந்தேகநபர் வெள்ளவத்தை பகுதியில் இருந்து யாழ்ப்பாணத்தை நோக்கி பயணித்துக் கொண்டிருப்பது தெரியவந்தது.

இதனையடுத்து விரைந்து செயல்பட்ட யாழ்ப்பாண பிரிவு குற்றப் புலனாய்வுப் பிரிவினர், சந்தேகநபர் பயணித்த பேருந்தை சாவகச்சேரி, கைதடி பகுதியில் மறித்து, சந்தேகநபரையும் அவரது மனைவியையும் அவர்களின் குழந்தையுடன் கைது செய்தனர். அவர்கள் யாழ்ப்பாணம் வழியாக இந்தியாவிற்கு தப்பிச் செல்ல திட்டமிட்டிருந்திருக்கலாம் என பொலிஸார் சந்தேகிக்கின்றனர்.

கைது செய்யப்படும்போது சந்தேகநபர் தொப்பி மற்றும் முகக்கவசம் அணிந்திருந்தார். மேலும், அவரது மனைவி முஸ்லிம் பெண்ணைப் போல போலியாக வேடமிட்டிருந்தார். சந்தேகநபர் அடிக்கடி பயன்படுத்தும் போலி தலைமுடியும் அவரிடமிருந்து பொலிஸாரால் கைப்பற்றப்பட்டது.

விசாரணையில் சந்தேகநபர் கூறுகையில், உயிரிழந்த பெண் தங்கியிருந்த அறைக்கு சென்றபோது அவர் தூக்கிட்டு தற்கொலை செய்துகொண்டிருந்ததாகவும், இதனால் அச்சமடைந்து சடலத்தை காரில் ஏற்றி தெல்தெனியாவிற்கு கொண்டு சென்றதாகவும் கூறியுள்ளார்.

ஆனால் பிரேத பரிசோதனை அறிக்கைகள், இது கழுத்தை நெரித்து கொலை செய்யப்பட்டது என்பதை உறுதிப்படுத்தியுள்ளன. மேலும், அவரிடமிருந்து தான் பணம் பெற்றிருந்தாலும், அது ஒன்றரை கோடி ரூபாய் அல்ல எனவும் அவர் தெரிவித்துள்ளார்.

தனது கணவரால் ஏமாற்றப்படும் பெண்களுக்கு, தான் அந்த நபரின் "மூத்த சகோதரி" என்று தன்னை அறிமுகப்படுத்திக் கொண்டு, இந்த மோசடிகளுக்கு உதவி செய்ததாக மனைவி வாக்குமூலத்தில் தெரிவித்துள்ளார். இவர்களுக்கு மூன்று பிள்ளைகள் இருந்த நிலையில், இருவரை கடந்த 21 ஆம் தேதி நாரம்மலவில் உள்ள தனது பூர்வீக வீட்டிற்கு அனுப்பி வைத்ததாகவும் அவர் கூறினார்.

சந்தேகநபருக்கு தங்குமிடம் மற்றும் போக்குவரத்து வசதிகளை வழங்கிய குண்டசாலை பிரதேச சபை ஊழியர் ஒருவரும் கைது செய்யப்பட்டார். கொலை நடந்த 16 ஆம் தேதி மாலை, பிரதான சந்தேகநபர் சடலம் இருந்த அதே காரில் அந்த ஊழியரின் வீட்டிற்கு வந்துள்ளார். பின்னர், சந்தேகநபரின் மனைவி மற்றும் மூன்று குழந்தைகளையும் அழைத்து வந்து, அந்த வீட்டில் இரவு தங்கியுள்ளனர்.

மறுநாள் சடலத்தை தெல்தெனியாவிற்கு கொண்டு செல்லும்போது, அந்த ஊழியர் மோட்டார் சைக்கிளில் காருக்கு பின்னால் சென்றுள்ளார். சடலத்தை வீசிய பிறகு, சந்தேகநபரை மீண்டும் தனது வீட்டிற்கு அழைத்து வந்துள்ளார். பின்னர் இந்த நபர்களை மாத்தளையில் உள்ள சந்தேகநபரின் தாயின் வீட்டிற்கு அழைத்துச் செல்லவும் அவர் உதவியுள்ளார். மேலும், சந்தேகநபர் இந்த ஊழியரின் மனைவியிடமும் 5 இலட்சம் ரூபாய் பணத்தை மோசடி செய்துள்ளதாக அவர் தனது வாக்குமூலத்தில் தெரிவித்துள்ளார்.

பொலிஸ் விசாரணைகளின்படி, பிரதான சந்தேகநபர் 30 வயதுக்கு மேற்பட்ட, திருமணமாகாத பெண்களை இலக்கு வைத்து, திருமணம் செய்து கொள்வதாக கூறி ஏமாற்றும் பெரும் மோசடிக்காரர் ஆவார். உயிரிழந்த பிசியோதெரபிஸ்ட்டை அம்பாறை வைத்தியசாலையில் சிகிச்சை பெறச் சென்றபோதுதான் அவர் சந்தித்துள்ளார்.

இவர் பல்வேறு தந்திரோபாயங்கள் மூலம் பெண்களை ஏமாற்றிப் பெற்ற மொத்தப் பணம் இரண்டு கோடி ரூபாவிற்கும் அதிகம் என்பது விசாரணையில் தெரியவந்துள்ளது. மேலும், அவர் கட்டுகஸ்தோட்டை பகுதியில் ஆடை விற்பனை நிலையம் ஒன்றையும் ஆரம்பித்துள்ளதுடன், அங்கு பணியாற்றிய இளம் பெண்ணிடமும் 10 இலட்சம் ரூபாவை அபகரிக்க திட்டமிட்டிருந்தமை கண்டறியப்பட்டுள்ளது.

பிரதான சந்தேகநபரும், அவரது மனைவியும் மேலதிக விசாரணைக்காக தற்போது நுவரெலியா பொலிஸாரிடம் ஒப்படைக்கப்பட்டுள்ளனர்.