திடீர் திருப்பம்! கடகத்தை விட்டு விலகும் குரு: விஜய் ஆட்சிக்கு ஆபத்தா? 2027-ல் நடப்பது என்ன? ஜோதிட கணிப்பு முழு விபரம் இதோ!

தமிழக அரசியல் களம் எப்போதும் பரபரப்புக்கும் எதிர்பார்ப்புகளுக்கும் பஞ்சம் இல்லாதது. பல தசாப்தங்களாகத் திராவிடக் கட்சிகள் மாறி மாறி ஆட்சி செய்து வந்த சூழலில், புதிய அரசியல் சக்தியாகத் தமிழக வெற்றிக் கழகம் ஆட்சிக் கட்டிலில் அமர்ந்துள்ள சூழல் அரசியல் வட்டாரத்தில் தொடர் விவாதங்களை ஏற்படுத்தியுள்ளது.

எதிர்க்கட்சிகள் முன்வைக்கும் அரசியல் விமர்சனங்கள் மற்றும் ஆட்சி நீடிக்குமா என்ற தொடர் யூகங்களுக்கு மத்தியில், நவகிரகங்களின் சஞ்சார நிலைகள் எதை உணர்த்துகின்றன என்பது குறித்து பிரபல ஜோதிடர் ஜெயலட்சுமி அவர்கள் விரிவான ஜோதிடக் கணிப்புகளைப் பகிர்ந்துள்ளார்.

நவகிரக அமைப்புகளின்படி, தேவகுருவான குரு பகவான் தற்போது கடக ராசியில் உச்சம் பெற்று சஞ்சரிக்கிறார். முதல்வர் விஜய்யின் ராசி கடகம் என்பதால், தற்போது அவருக்கு ஜென்ம குருவின் ஆதிக்கம் நிலவுகிறது. குரு பகவான் அக்டோபர் மாத இறுதியில் அதிசாரமாக சிம்ம ராசிக்குப் பெயர்ச்சியாகி, அங்கு சில மாதங்கள் கேதுவுடன் இணைந்திருப்பார்.

அதனைத் தொடர்ந்து வக்ர கதியில் மீண்டும் கடக ராசிக்குத் திரும்பி 2027 ஆம் ஆண்டு ஜூன் மாதம் வரை அங்கேயே தொடர்வார். இடையில் டிசம்பர் மாதத்தில் நிகழும் ராகு-கேது பெயர்ச்சியின் போது, கேது சிம்மத்திலிருந்து கடக ராசிக்கும், ராகு மகர ராசிக்கும் இடம்பெயர்கின்றனர். அப்போது மகரத்தில் இருக்கும் ராகுவின் பார்வையும் கடகத்திற்கு விழும் வேளையில், கேதுவுடன் குருவின் கூட்டணி உருவாகும் சூழல் அமைகிறது.

2027 ஆம் ஆண்டு ஜூன் மாதத்தில் நிகழும் முறையான குரு பெயர்ச்சியின் போது, கடகத்தில் உச்சம் பெற்றிருந்த குரு பகவான் சிம்ம ராசிக்கு இடப்பெயர்ச்சி அடைகிறார். தொடர்ந்து அதே ஆண்டு நவம்பரில் அதிசாரமாக கன்னி ராசிக்கும் சஞ்சரிக்கவுள்ளார். 2027 ஆம் ஆண்டில் குரு பகவான் ஆயில்யம், மகம், பூரம் மற்றும் உத்திரம் ஆகிய நட்சத்திரப் பாதைகளில் பயணிப்பார்.

மேதினி ஜோதிட (Mundane Astrology) விதிகளின்படி உத்திரம், அஸ்தம், சித்திரை ஆகிய நட்சத்திரங்கள் தமிழ்நாடு உள்ளிட்ட தென்னிந்தியப் பகுதிகளை ஆளுமை செய்கின்றன. இந்த நட்சத்திரக் காலங்களில் குருவின் இயக்கம் அமையவிருப்பதால், தமிழக அரசியல் நிர்வாகத்தில் சில முக்கிய மாற்றங்கள் நிகழலாம்; எனினும் அது ஆட்சி மாற்றமாக இருக்காது என்றும், அமைச்சரவை மாற்றம் அல்லது புதிய கூட்டணிக் கட்சிகளின் வரவாக மட்டுமே இருக்கும் என்றும் ஜோதிட ரீதியாகக் கணிக்கப்படுகிறது.

மறுபுறம், கர்மகாரகனான சனி பகவான் திருக்கணித பஞ்சாங்க முறைப்படி 2027 ஜூன் மாதத்தில் மீன ராசியிலிருந்து மேஷ ராசிக்குப் பெயர்ச்சியாகிறார். பின்னர் ஆகஸ்ட் மாதத்தில் வக்ரமடைந்து அக்டோபரில் மீண்டும் மீன ராசிக்கே திரும்புவார். கடக ராசிக்கு 10-ஆம் இடமான கர்ம ஸ்தானத்தில் சனி சஞ்சரிக்கும் காலத்தில், அரசியல் ரீதியான கடும் சவால்களும் நிர்வாக அழுத்தங்களும் உருவாகக்கூடும்.

எனினும், சிம்ம ராசியில் சஞ்சரிக்கும் குரு பகவானின் பார்வை மேஷத்தில் உள்ள சனியின் மீது விழுவதால், எதிர்க்கட்சிகளின் நெருக்கடிகளையும் அரசியல் சூழ்ச்சிகளையும் முதல்வர் விஜய் தனது சாணக்கியத்தனத்தால் சாதுரியமாக முறியடிப்பார் என்று ஜோதிட ரீதியாகக் கூறப்படுகிறது.

2027 ஆம் ஆண்டின் பிற்பகுதியில் அதிசார குரு கன்னி ராசிக்கு நகரும் வேளையில், மீனத்தில் வக்ர நிலையில் இருக்கும் சனியின் பார்வையும் நிர்வாக ரீதியான மறுசீரமைப்புகளுக்கு வழிவகுக்கும். அதேசமயம் கடக ராசியில் ஜென்ம கேது நிலைபெற்றிருக்கும் காலத்தில், மகர ராகுவின் பார்வையும் கிடைப்பதால் முக்கிய அரசியல் முடிவுகளை எடுப்பதில் சில தடுமாற்றங்களும், கூட்டணிக் கட்சிகளிடையே சிறு சலசலப்புகளும் உருவாக வாய்ப்புள்ளது.

மொத்தத்தில் கிரக நிலைகளின் சேர்க்கை ஆட்சிக்கு அச்சுறுத்தலை ஏற்படுத்தாமல், அரசியல் ரீதியான வியூகங்களை மாற்றி அமைக்கும் ஒரு பரீட்சைக் களமாகவே 2027 ஆம் ஆண்டை அமைத்துக் கொடுக்கும்.