"எந்தப் பெண்ணும் இதை அனுபவிக்கக் கூடாது" - கன்னட நடிகை திவ்யா சுரேஷ் நடுரோட்டில் பாலியல் தொல்லை; பெங்களூர் போலீசுக்கு கேள்வி!

பெங்களூரு: கன்னட சினிமா நடிகையும், பிக் பாஸ் கன்னட சீசன் 8 போட்டியாளருமான திவ்யா சுரேஷ் (வயது 33), பெங்களூரில் நடந்த பாலியல் தொல்லை சம்பவம் குறித்து அதிர்ச்சியூட்டும் பதிவை வெளியிட்டுள்ளார். கடந்த ஞாயிற்றுக்கிழமை (ஜூன் 28) இரவு 11.30 மணியளவில், பெங்களூரின் கனகபுரா மெயின் ரோடு பகுதியில் தனது உறவினருடன் நடந்து சென்று கொண்டிருந்தபோது, அடையாளம் தெரியாத ஒரு இளைஞர் அவர்களைப் பின்தொடர்ந்து, ஆபாசமான அசைவுகளை செய்துள்ளார்.

இந்த சம்பவம் குறித்து திவ்யா சுரேஷ் தனது இன்ஸ்டாகிராம் ஸ்டோரியில் பகிர்ந்துள்ள பதிவில், "இன்று இரவு 11.30 மணியளவில், நானும் என் உறவினரும் எங்கள் காரை நோக்கி நடந்து கொண்டிருந்தோம். அப்போது ஒரு மனிதர் எங்களைப் பின்தொடர ஆரம்பித்தார். பின்தொடரும் போது, அவர் வெளிப்படையாக தன்னைத் தொட்டுக் கொண்டிருந்தார். நாங்கள் உடனே கவனித்து எதிர்க்குரல் கொடுத்தோம், ஆனால் அவர் நிறுத்தவில்லை. நாங்கள் காரில் ஏறும் வரை அவர் தொடர்ந்தார்" என்று கூறியுள்ளார்.

மேலும், காரில் ஏறி கதவுகளைப் பூட்டிய பின்னரும், அந்த நபர் காரின் வெளியே நின்று கொண்டு தனது ஆபாசமான அசைவுகளைத் தொடர்ந்ததாகவும், இதனால் தாங்கள் மிகவும் அச்சமடைந்ததாகவும் அவர் தெரிவித்துள்ளார்.

இந்த சம்பவத்தை தொடர்ந்து, பெங்களூரு போலீசாரை தனது பதிவில் டேக் செய்த திவ்யா, "இரவில் நடப்பதற்காக மட்டுமே எந்தப் பெண்ணும் இதை அனுபவிக்கக் கூடாது" என கூறியதோடு, "எங்களுக்கு வாக்களிக்கப்பட்ட பாதுகாப்பு எங்கே?" என்ற கேள்வியையும் எழுப்பியுள்ளார்.

தனது செல்போனில் இந்த சம்பவத்தை பதிவு செய்த திவ்யா, அந்த வீடியோவையும் தனது இன்ஸ்டாகிராம் ஸ்டோரியில் பகிர்ந்துள்ளார். அந்த வீடியோவில், தான் பதிவு செய்து கொண்டிருப்பதாகவும், தனது உறவினர் அந்த நபரின் செயலை சுட்டிக்காட்டி பார்க்கச் சொல்வதாகவும், காரில் ஏறியதும் அவர் பின்தொடர்ந்ததாகவும், போலீசை அழைக்குமாறு தனது உறவினர் கூறுவதாகவும் தெரிவித்துள்ளார். தற்போது இந்த வீடியோ சமூக வலைதளங்களில் வைரலாகி வருகிறது.

இந்த சம்பவம் பெங்களூரு நகரில், குறிப்பாக இரவு நேரங்களில் பெண்களின் பாதுகாப்பு குறித்த கேள்விகளை மீண்டும் எழுப்பியுள்ளது. அப்பகுதி பொதுமக்கள் சிலர் தலையிட்டு அந்த நபரை எதிர்கொண்டதாகவும், அதன் பின்னர் அவர் அங்கிருந்து தப்பி ஓடியதாகவும் கூறப்படுகிறது. தற்போது வரை பெங்களூரு போலீஸார் இது குறித்து அதிகாரப்பூர்வ அறிக்கை எதுவும் வெளியிடவில்லை, மேலும் திவ்யா சுரேஷ் தரப்பில் இருந்து முறையான புகார் எதுவும் பதிவு செய்யப்படவில்லை என்று தகவல்கள் தெரிவிக்கின்றன.

திவ்யா சுரேஷ் யார்?

பிக் பாஸ் கன்னட சீசன் 8-ல் பங்கேற்ற திவ்யா சுரேஷ், 'நன்னா ஹெந்த்தி எம்பிபிஎஸ்', 'ஜோடி ஹக்கி' உள்ளிட்ட கன்னட தொலைக்காட்சி தொடர்களில் நடித்துள்ளார். மேலும், 2017-ல் மிஸ் இந்தியா சவுத் பட்டத்தை வென்ற இவர், அதே ஆண்டில் 'ஹில்டன் கிராஸ்', 'ரவுடி பேபி' உள்ளிட்ட படங்களில் அறிமுகமானார். கடந்த ஆண்டு பெங்களூரில் நடந்த ஹிட் அண்ட் ரன் வழக்கில் இவர் சம்பந்தப்பட்டிருந்தது குறிப்பிடத்தக்கது.