சவுதியில் திருமணமாகாமல் குழந்தை பெற்ற பெண்ணுக்கு 100 கசையடி தண்டனை விதிக்கப்பட்டதாகத் தகவல்!

சவுதி அரேபியாவில் திருமணமாகாமல் குழந்தை பெற்றெடுத்த கென்யாவைச் சேர்ந்த பெண்ணுக்கு 100 கசையடி தண்டனை விதிக்கப்பட்டுள்ளதாகச் செய்திகள் வெளியாகியுள்ளன. எஸ்தர் வஞ்சா முதோனி (Esther Wanja Muthoni) என்ற பெண்ணுக்கே கடந்த ஒக்டோபர் மாதம் சவுதி நீதிமன்றம் இந்தத் தண்டனையை விதித்ததாகத் தெரிவிக்கப்படுகிறது.

குழந்தைக்கான பிறப்புச் சான்றிதழ் மற்றும் பயண ஆவணங்களைப் பெற்றுக்கொள்வதில் ஏற்பட்டுள்ள சட்டச் சிக்கல்கள் காரணமாக, அவர் தனது குழந்தையுடன் கென்யாவுக்குத் திரும்ப முடியாத நிலையை எதிர்கொண்டுள்ளதாகவும் கூறப்படுகிறது. கென்யாவைச் சேர்ந்த எஸ்தர் வஞ்சா முதோனி, மஹாரா ஹியூமன் ரிசோர்சஸ் என்ற நிறுவனத்தின் ஊடாகச் சட்டபூர்வமாக சவுதி அரேபியாவுக்குச் சென்று வீட்டுப் பணியாளராக வேலை செய்து வந்ததாகத் தெரிவிக்கப்படுகிறது.

அங்கு வசித்த எகிப்து நாட்டைச் சேர்ந்த ஒருவருடன் ஏற்பட்ட உறவைத் தொடர்ந்து அவர் கர்ப்பமடைந்ததாகச் செய்திகள் குறிப்பிடுகின்றன. திருமணமாகாத நிலையில், கடந்த 2025ஆம் ஆண்டு ஓகஸ்ட் மாதம் அவருக்கு ஆண் குழந்தை பிறந்துள்ளது. குழந்தைக்கு அபுடி எனப் பெயரிடப்பட்டுள்ளதாகவும் தெரிவிக்கப்படுகிறது.

குழந்தை பிறந்தமை தொடர்பில் தகவல் அறிந்த மேற்பார்வையாளர் ஒருவர், எஸ்தரையும் குழந்தையையும் மருத்துவமனைக்கு அழைத்துச் சென்றதாகக் கூறப்படுகிறது. அதனைத் தொடர்ந்து கர்ப்பம் மற்றும் குழந்தையின் பிறப்பு தொடர்பில் விசாரணை நடத்துவதற்காக எஸ்தரைப் பொலிஸார் காவலில் எடுத்துள்ளனர்.

விசாரணையின்போது குழந்தையின் தந்தை முகமது என்ற நபர் எனவும், அவர் ஏற்கெனவே சவுதி அரேபியாவிலிருந்து வெளியேறிவிட்டதாகவும் எஸ்தர் தெரிவித்ததாகச் செய்திகள் குறிப்பிடுகின்றன. பின்னர் அவர் பொலிஸ் காவலிலிருந்து விடுவிக்கப்பட்டதாகத் தெரிவிக்கப்படுகிறது.

இந்தச் சம்பவத்திற்குப் பின்னர் எஸ்தர் தங்கியிருந்த தொழிலாளர் குடியிருப்பில் அவருக்கு மீண்டும் இடமளிக்கப்படவில்லை எனக் கூறப்படுகிறது.வேறு தங்குமிடங்களைப் பெற்றுக்கொள்வதிலும் சிரமங்களை எதிர்கொண்ட அவர், ஒரு கட்டத்தில் எரிபொருள் நிரப்பு நிலையமொன்றில் தஞ்சமடைந்ததாகத் தகவல்கள் வெளியாகியுள்ளன.

அவரது நிலைமை ஊடகங்களில் வெளியான பின்னர், மஹாரா நிறுவனம் தங்குமிட வசதியை ஏற்படுத்திக் கொடுத்ததாகத் தெரிவிக்கப்படுகிறது. இதற்கிடையில், கென்யத் தூதரகமும் அவர் நாடு திரும்புவதற்குத் தேவையான சில ஆவணங்களை வழங்கியுள்ளதாகக் கூறப்படுகிறது.

எனினும், நிலுவையில் இருந்த சட்ட நடவடிக்கைகள் காரணமாக அவரால் சவுதி அரேபியாவிலிருந்து வெளியேற முடியவில்லை எனச் செய்திகள் தெரிவிக்கின்றன.எஸ்தர் தனது குழந்தையுடன் கென்யாவுக்குத் திரும்புவதற்குக் கடந்த ஓராண்டுக்கும் மேலாக முயற்சித்து வருவதாகத் தெரிவிக்கப்படுகிறது.

ஆனால், குழந்தையின் பிறப்பைப் பதிவு செய்வது, பிறப்புச் சான்றிதழைப் பெற்றுக்கொள்வது மற்றும் பயண ஆவணங்களைத் தயாரிப்பது போன்ற நடவடிக்கைகளில் சட்ட மற்றும் நிர்வாகச் சிக்கல்கள் ஏற்பட்டுள்ளதாகக் கூறப்படுகிறது. இதனால் தாயும் குழந்தையும் சொந்த நாட்டுக்குத் திரும்ப முடியாத நிலை தொடர்வதாகச் செய்திகள் குறிப்பிடுகின்றன.

திருமணத்திற்கு வெளியேயான பாலியல் உறவு தொடர்பான குற்றச்சாட்டின் அடிப்படையில் எஸ்தருக்கு எதிராகச் சட்ட நடவடிக்கை மேற்கொள்ளப்பட்டதாகத் தெரிவிக்கப்படுகிறது. இந்த வழக்கில் கடந்த ஒக்டோபர் மாதம் தீர்ப்பளித்த சவுதி நீதிமன்றம், அவருக்கு 100 கசையடி தண்டனை விதித்ததாகச் செய்திகள் வெளியாகியுள்ளன.

சவுதி அரேபியாவில் கசையடி தண்டனையை ஒழிக்கும் வகையிலான நீதித்துறை மாற்றங்கள் 2020ஆம் ஆண்டில் அறிவிக்கப்பட்டிருந்தன. குறிப்பாக, சில குற்றங்களுக்கான தண்டனையாகக் கசையடி வழங்குவதை மாற்றி சிறைத்தண்டனை அல்லது அபராதம் விதிப்பது தொடர்பான நடவடிக்கைகள் அப்போது அறிவிக்கப்பட்டன.

இந்தப் பின்னணியில், கென்யப் பெண்ணுக்கு 100 கசையடி தண்டனை விதிக்கப்பட்டதாக வெளியாகியுள்ள தகவல், அந்த நீதித்துறை மாற்றங்களின் நடைமுறை மற்றும் சட்ட வரம்புகள் தொடர்பான கேள்விகளை எழுப்பியுள்ளது.

சவுதி அரேபியா உள்ளிட்ட வளைகுடா நாடுகளில் பணிபுரியும் சில வெளிநாட்டு வீட்டுப் பணியாளர்கள், தொழிலாளர் உரிமைகள் மற்றும் தனிப்பட்ட பாதுகாப்பு தொடர்பான சவால்களை எதிர்கொள்வதாக மனித உரிமை அமைப்புகள் நீண்டகாலமாகக் கவலை வெளியிட்டு வருகின்றன.

குறிப்பாகத் தங்குமிடம், வேலை நிபந்தனைகள், சம்பளம், சட்ட உதவி மற்றும் தூதரகச் சேவைகளை அணுகுவதில் ஏற்படும் சிரமங்கள் முக்கியமான பிரச்சினைகளாகச் சுட்டிக்காட்டப்படுகின்றன.