பிரித்தானியாவில் பணவீக்கம் எதிர்பாராத வீழ்ச்சி – வட்டி விகிதக் குறைப்புக்கு வழிவகுக்குமா?

பிரித்தானியாவில் பணவீக்கம் எதிர்பாராத விதமாக வீழ்ச்சியடைந்துள்ளது. நவம்பர் மாதத்தில் பணவீக்க விகிதம் 3.2% ஆகப் பதிவாகியுள்ளது. இது, அக்டோபரில் பதிவான 3.6% ஐ விட குறிப்பிடத்தக்க குறைவாகும். மேலும், இது மார்ச் 2025 மாதத்திற்குப் பிறகு பதிவான மிகக் குறைந்த அளவு ஆகும்.

இந்தக் குறைவுக்குப் பல காரணிகள் பங்களித்துள்ளன. கேக், பிஸ்கட், தானியங்கள், இனிப்புப் பொருட்கள் போன்றவற்றின் விலைகள் குறைந்துள்ளன. Black Friday சலுகைகள் காரணமாக பெண்கள் ஆடைகளின் விலைகளும் குறைந்துள்ளன. அத்துடன், புகையிலை விலையிலும் சிறிய அளவில் குறைவு ஏற்பட்டுள்ளது.

மேலும், உணவு மற்றும் பானங்களின் விலை உயர்வு 4.9% இலிருந்து 4.2% ஆகக் குறைந்துள்ளது. சேவைத் துறை பணவீக்கம் 4.4% ஆகவும், மைய பணவீக்கம் (core inflation) 3.4% இலிருந்து 3.2% ஆகவும் குறைந்துள்ளது.

இந்தத் தரவுகள், இங்கிலாந்து வங்கி (Bank of England) தனது வட்டி விகிதத்தை குறைக்கும் திசையில் நகர வழிவகுக்கும் என்று பொருளாதார நிபுணர்கள் கருதுகின்றனர். சந்தை ஆய்வுகளின்படி, அடுத்த கூட்டத்தில் வட்டி விகிதம் 3.75% ஆகக் குறைவதற்கு 100% சாத்தியம் உள்ளதாக மதிப்பிடப்பட்டுள்ளது.

இந்த நிலைமாற்றத்தின் தாக்கம் ஏற்கனவே சந்தைகளில் பிரதிபலிக்கத் தொடங்கியுள்ளது. ஸ்டெர்லிங் பவுண்டின் மதிப்பு அமெரிக்க டாலருக்கு எதிராக குறைந்துள்ளது. அதேபோல், அரசு பத்திரங்களின் (gilt yields) வட்டி விகிதமும் இறங்கியுள்ளது.

இங்கிலாந்து வங்கியின் Monetary Policy Committee (MPC) கடந்த மாதம் வட்டி விகிதத்தை நிலைநிறுத்தியது. ஆனால், வங்கியின் ஆளுநர் ஆண்ட்ரூ பேலி, விலை அழுத்தங்கள் தொடர்ந்து குறைந்தால் வட்டி குறைப்பை ஆதரிப்பதாக ஏற்கனவே தெரிவித்திருந்தார். இப்போது அந்த சூழல் உருவாகியுள்ளது.

மேலும், அரசின் புதிய பட்ஜெட் நடவடிக்கைகள் 2026 ஏப்ரல் முதல் பணவீக்கத்தை மேலும் 0.5% வரை குறைக்கலாம் என்று இங்கிலாந்து வங்கியின் துணை ஆளுநர் கிளேர் லொம்பார்டெல்லி கூறியுள்ளார்.

இந்த மாற்றங்கள், பிரித்தானியாவின் பொருளாதார நிலைமை மற்றும் நிதிக் கொள்கைகளில் ஒரு முக்கியமான திருப்பமாக கருதப்படுகின்றன. வட்டி விகிதக் குறைப்பு, நுகர்வோர் செலவுகளையும், முதலீட்டையும் ஊக்குவித்து, பொருளாதார வளர்ச்சிக்கு உதவும் என்று எதிர்பார்க்கப்படுகிறது. 2026 முழுவதும் தொடர்ந்த வட்டி குறைப்புகள் நிகழும் என்றும் பொருளாதார ஆய்வாளர்கள் கணித்துள்ளனர்.