2025 இந்தியன் பிரீமியர் லீக் சென்னை சூப்பர் கிங்ஸ் அணிக்கு மோசமாகவே அமைந்துள்ளது. சிஎஸ்கே அணி இதுவரை ஐந்து போட்டிகளில் விளையாடி, அதில் ஒரு போட்டியில் தான் வெற்றிப் பெற்றுள்ளது. 6 முறை சாம்பியனான சிஎஸ்கே தற்போது புள்ளிப் பட்டியலில் 9வது இடத்தில் உள்ளது.
இந்த தோல்விக்கு பல காரணங்களை அடுக்கிக்கொண்டே போகலாம். அதில் முக்கிய காரணமாக, பவர் பிளேவில் சிஎஸ்கே பேட்ஸ்மேன்களின் தொடக்கம் மிகவும் மந்தமாக உள்ளது. அதேபோல் அணியின் மிடில் ஆர்டர் பேட்ஸ்மேன்களும் வெற்றிக்கு தேவையான வகையில் பங்களிப்புகளை தருவதில்லை. அதைவிட மோசம் ஃபீல்டிங் தான். எல்லா மேட்ச்சிலும் கைக்கு வரும் கேட்ச்சை விடுகிறார்கள்.
இந்த இக்கட்டான சூழலில் தான் சிஎஸ்கேவின் கேப்டன் ருத்துராஜ் கெய்க்வாடுக்கு காயம் ஏற்பட்டு நடப்பு ஐபிஎல் தொடரில் இருந்து விலகியுள்ளார். அவருக்கு பதிலாக சென்னை சூப்பர் கிங்ஸ் அணியின் கேப்டனாக மகேந்திர சிங் தோனி அணியை வழிநடத்துவார் என அறிவிக்கப்பட்டுள்ளது. சிஎஸ்கே நிர்வாகத்தின் இந்த அறிவிப்பு சோர்ந்து போய் உள்ள சிஎஸ்கே ரசிகர்களுக்கு உற்சாகத்தை ஊட்டியுள்ளது.
இந்த நிலையில் காயம் காரணமாக விலகும் ருத்துராஜுக்கு பதில் அதிரடி ஆட்டக்காரர் பிரித்வி ஷா சிஎஸ்கே அணியில் இடம்பிடிப்பார் என சொல்லப்படுகிறது. டெல்லி அணிக்காக அபாரமாக ஆடிவந்த பிரித்வி ஷா மோசமான ஃபார்ம் காரணமாக இந்த ஏலத்தில் விலைக்கு போகாமல் இருந்தார்.
இந்த நிலையில் ருத்துராஜுக்கு மாற்றாக பிரித்வி ஷாவை தற்போது சிஎஸ்கே-வில் இணைக்க தோனி திட்டமிட்டிருப்பதாக தகவல் வெளிவந்துள்ளது. கொல்கத்தா அணிக்கு எதிரான இன்றைய போட்டியில் இல்லை என்றாலும் விரைவில் சிஎஸ்கே அணியில் அவர் இணைய வாய்ப்பிருப்பதாக சொல்லப்படுகிறது.
